გაეროში ირანის ელჩმა ამირ საიდ ირავანიმ განაცხადა, რომ ირანი არასოდეს შეწყვეტს ბირთვულ გამდიდრებას, რადგან ბირთვული იარაღის გაუვრცელებლობის შესახებ ხელშეკრულების ფარგლებში ეს მისი უფლებაა. მან აღნიშნა, რომ ირანი მზადაა მოლაპარაკებებისთვის, თუმცა "უდავო კაპიტულაცია მოლაპარაკება არ არის, ეს დიქტატია." ამის შესახებ ინფორმაციას The Guardian ავრცელებს.

ირავანიმ აღნიშნა, რომ ბოლო აგრესიის ფონზე მოლაპარაკებისთვის შესაბამისი პირობები არ არსებობს და პრეზიდენტთან შეხვედრა არ იგეგმება. მან უარყო ბრალდებები, რომ ირანი დაემუქრა ბირთვული ენერგიის საერთაშორისო სააგენტოს (IAEA) დირექტორს რაფაელ გროსის ან სააგენტოს ინსპექტორებს. მიუხედავად იმისა, რომ ირანმა IAEA-სთან თანამშრომლობა შეაჩერა — ინსპექტორები ქვეყანაში რჩებიან, მაგრამ არ აქვთ წვდომა ბირთვულ ობიექტებზე, რაც თეირანის თქმით იმიტომ ხდება, რომ საქმეს შესაბამისად ვერ ართმევენ თავს.

ირავანიმ ასევე თქვა, რომ თუ შეთანხმება შედგება, ირანი მზადაა გამდიდრებული ურანი (20%-ისა და 60%-ის) ნაწილობრივ სხვა ქვეყნებს გადასცეს ან IAEA-ს ზედამხედველობით შეინახოს, მაგრამ არ უარყოფს შიდა წარმოების უფლებას, რაც აშშ-სთვის მიუღებელია.

ამავდროულად, დაძაბულობა გაიზარდა აშშ-ის მიერ ირანულ ობიექტებზე განხორციელებული ავიაიერიშების შემდეგ. დონალდ ტრამპმა განაცხადა, რომ ობიექტები "სრულად განადგურდა", თუმცა გროსიმ აღნიშნა, რომ ირანი რამდენიმე თვეში შეძლებს ურანის გამდიდრების აღდგენას, რადგან ცენტრიფუგების ინფრასტრუქტურა ჯერ კიდევ არსებობს.

ტრამპმა უარყო მტკიცება, თითქოს ირანმა 400 კგ 60%-იანი გამდიდრებული ურანი იერიშამდე გადამალა.

The Washington Post-ის ინფორმაციით, აშშ-მა მოიპოვა ინფორმაცია ირანის შიდა კომუნიკაციების შესახებ, რომლებშიც ირანელი მაღალჩინოსნები აღიარებდნენ, რომ ზიანი მოსალოდნელზე ნაკლები იყო. თეთრმა სახლმა ეს ინფორმაცია არ უარყო, თუმცა ირანის შეფასებას აბსურდული უწოდა.

გარდა ამისა, ირანის შეიარაღებული ძალების შტაბის უფროსმა აბდოლრაჰიმ მუსავიმ საუდის არაბეთის თავდაცვის მინისტრთან საუბარში განაცხადა, რომ თეირანს არ სჯერა, რომ ისრაელი შეასრულებს ცეცხლის შეწყვეტის შეთანხმებას და შესაბამისად, ირანი სერიოზული პასუხისთვის მზად არის.

მისი თქმით, აშშ და ისრაელი არღვევენ საერთაშორისო წესებს, ხოლო ირანი მხოლოდ თავს იცავდა და ომი არ დაუწყია.

ცნობისთვის, ახლო აღმოსავლეთში დაძაბულობის უპრეცედენტო გამწვავების ფონზე, ისრაელმა 13 ივნისს, გამთენიისას, მასშტაბური სამხედრო იერიში მიიტანა ირანის ბირთვულ და სამხედრო ობიექტებზე. საჰაერო შეტევები, რომელიც ირანის წინააღმდეგ განხორციელებული ყველაზე ინტენსიური იერიში იყო ისრაელის თანამედროვე ისტორიაში, ძირითადად მიმართული იყო ბირთვულ ობიექტებზე, სარაკეტო ბაზებსა და ირანის უმაღლეს სამხედრო ხელმძღვანელობაზე.

ასევე, შეერთებულმა შტატებმა 22 ივნისს ირანში სამ ძირითად ბირთვულ ობიექტზე, ფორდოუზე, ისპაჰანსა და ნათანზიზე, იერიში მიიტანა, რომლის შედეგადაც The Times of Israel-ის ცნობით, 86 ადამიანი დაშავდა.