ათასობით მომიტინგემ კვირას ღამით ბელგრადში და სერბეთის სხვა ქალაქებში მთავარი გზები გადაკეტა. ამის შესახებ ინფორმაციას Deutsche Welle ავრცელებს.

ეს საპროტესტო ტალღა ერთი დღით ადრე დედაქალაქში გამართულ მასშტაბურ აქციას მოჰყვა, სადაც მონაწილეები ვადამდელ არჩევნებს და მემარჯვენე-პოპულისტი პრეზიდენტის, ალექსანდარ ვუჩიჩის გადადგომას მოითხოვდნენ.

აქტივისტებმა განაცხადეს, რომ გზის ბლოკადები შაბათის აქციის შემდეგ "მრავალი მოქალაქის" დაკავებაზე პასუხი იყო. ბელგრადის ცენტრში გამართულ აქციას დაახლოებით 140 000 ადამიანი ესწრებოდა.

სერბეთის შინაგან საქმეთა მინისტრის თქმით, დაკავებული 77 მომიტინგეთაგან ნაწილი უკვე გათავისუფლებულია, ხოლო 38 სისხლის სამართლის ბრალდებით, პატიმრობაში რჩება.

მომიტინგეებმა ქალაქის მასშტაბით მეტალის ბარიკადები და ნაგვის ურნები განათავსეს.

კვირას გამართული პროტესტის მონაწილეები სტუდენტებისა და სხვა დემონსტრანტების გათავისუფლებას ითხოვდნენ, რომლებიც შაბათს პოლიციასთან დაპირისპირების გამო დააკავეს.

სერბეთში ბოლო რამდენიმე თვეა ანტისამთავრობო საპროტესტო ტალღა არსებობს, რომელიც 2024 წლის ნოემბერში სარკინიგზო სადგურის სახურავის ჩამონგრევამ გამოიწვია, რასაც 16 ადამიანი ემსხვერპლა. პროტესტის მონაწილეები შემთხვევისთვის პასუხისმგებლობას ხელისუფლებას აკისრებენ.

პრეზიდენტი ალექსანდარ ვუჩიჩი უარყოფდა ვადამდელი არჩევნების მოთხოვნას და პროტესტის გაძლიერებაში "უცხოურ ძალებს" ადანაშაულებდა.

კვირას, ტელემიმართვაში ვუჩიჩმა კვლავ უარი თქვა ვადამდელი არჩევნების ჩატარებაზე და პროტესტს "ტერორი" უწოდა:

"სერბეთმა გაიმარჯვა, და ძალადობით ვერ დაამარცხებთ სერბეთს, როგორც ზოგიერთებს სურდათ," — განაცხადა მან.

ცნობისთვის, სერბეთში საპარლამენტო და საპრეზიდენტო არჩევნები 2027 წლისთვის არის დაგეგმილი.