16 არასამთავრობო ორგნიზაცია მიიჩნევს, რომ თიბისი ბანკის დამფუძნებლებისთვის ბრალის წაყენება გამოძიების მიმართ ბევრ კითხვას აჩენს. ამის შესახებ NGO-ების ერთობლივ განცხადებაშია აღნიშნული.

მათი თქმით, უკანონო შემოსავლების ლეგალიზების 11 წლის წინანდელ საქმეზე გამოძიება 2018 წლის აგვისტორში დაიწყო, რომლის საფუძველზეც არაერთი ლეგიტიმური კითხვა განჩდა. ისინი აღნიშნავენ, რომ მას შემდეგ მამუკა ხაზარაძისა და ბადრი ჯაფარიძის მიმართ სხვადასხვა სახელმწიფო უწყებებმა ბევრი საეჭვო გადაწყვეტილება მიიღეს.

არასამთავრობოები ფიქრობენ, რომ ამ საქმის გარშემო არსებული გარემოებები, ხაზარაძისა და ჯაფარიძის მიმართ გამოძიების დაწყება და ბრალის წაყენება, შესაძლოა, პოლიტიკურად იყოს მოტივირებული. მათივე თქმით, ამ ვარაუდს კიდევ უფრო ამყარებს ის ფაქტი, რომ 9 ივლისს მამუკა ხაზარაძემ საზოგადოებრივი მოძრაობის შექმნის შესახებ განაცხადა.

"ამასთანავე, მამუკა ხაზარაძე არის ანაკლიის განვითარების კონსორციუმის დამფუძნებელი, რომელიც ქვეყნის განვითარებისთვის უმნიშნელოვანესი ანაკლიის ღრმაწყლოვანი პორტის მშენებლობის პროექტის მთავარი განმახორციელებელია. მამუკა ხაზარაძემ ჯერ კიდევ 2019 წლის მარტის თვეში, საქართველოს პარლამენტის საფინანსო-საბიუჯეტო კომიტეტის სხდომაზე გამოსვლისას, ღიად ისაუბრა შინაგან საქმეთა მინისტრისა და ეროვნული ბანკის მხრიდან განხორციელებულ ზეწოლასა და შანტაჟზე", — წერია განცხადებაში.

მათი განცხადებით, ეს ყველა ფაქტი ამყარებს სხვადასხვა ორგანიზაციის მიერ გამოთქმულ შეშფოთებას არაფორმალური მმართველობისა და სახელმწიფოს მიტაცების მზარდი ტენდენციის შესახებ.

"ეს მოიცავს დიდი ძალაუფლების კონცენტრაციას მმართველი პარტიის და გავლენიანი პირების არაფორმალური დაჯგუფებების ხელში და მათ მიერ საჯარო ინსტიტუტების გამოყენებას კერძო მიზნებისა და ინტერესებისათვის", — ამბობენ ორგანიზაციები.

ისინი მოუწოდებენ გენერალურ პროკურატურას, წარადგინოს და გაასაჯაროვოს დამაჯერებელი მტკიცებულებები ხაზარაძისა და ჯაფარიძის ბრალეულობის შესახებ, რათა საზოგადოებაში არ დარჩეს კითხვები ბრალდების სხვა მოტივებთან დაკავშირებით.

"ამასთანავე, მნიშვნელოვანია, საზოგადოებას ეცნობოს რა ეტაპზეა თიბისი ბანკზე განხორციელებული კიბერშეტევის ფაქტზე დაწყებული გამოძიება. წინააღმდეგ შემთხვევაში, არსებული პასუხგაუცემელი კითხვები მნიშვნელოვნად შეაფერხებს სახელმწიფოს დემოკრატიულ განვითარებას და დიდ ზიანს მიაყენებს ქვეყნის საერთაშორისო რეპუტაციას", — აღნიშნავენ NGO-ები.

ისინი ასევე, მოუწოდებენ ხელისუფლებას, "კარგად გააცნობიეროს საკითხის სერიოზულობა და გაიაზროს ის ზიანი, რაც სახელმწიფო ინტერესებს შეიძლება შეექმნას, როგორც შერჩევითი თუ პოლიტიკური მართლმსაჯულების შესახებ საფუძვლიანი ეჭვების კიდევ უფრო გაღრმავებით, ისე საქართველოს გრძელვადიანი უსაფრთხოებისა და ეკონომიკური განვითარებისათვის უმნიშვნელოვანესი ანაკლიის პორტის პროექტის ნებისმიერი ფორმით შეფერხების შემთხვევაში".

არასამთავრობოები საერთაშიროსი პარტნიორებს მიმართავენ, განსაკუთრებული ყურადღება მიაქციონ საქართველოში განვითარებულ ბოლოდროინდელ მოვლენებს თიბისი ბანკისა და ანაკლიის პორტის პროექტის ირგვლივ, რათა მათივე თქმით, გამოუსწორებელი ზიანი არ მიადგეს საქართველოს გრძელვადიან დემოკრატიულ განვითარებას.

განცხადებას ხელს აწერენ:

  • საერთაშორისო გამჭვირვალობა — საქართველო;
  • ღია საზოგადოების ფონდი;
  • საქართველოს დემოკრატიული ინიციატივა;
  • მედიის განვითარების ფონდი;
  • მსოფლიო გამოცდილება საქართველოსთვის;
  • კვლევითი ჟურნალისტიკისა და ეკონომიკური ანალიზის ცენტრი;
  • საქართველოს რეფორმების ასოციაცია;
  • მწვანე ალტერნატივა;
  • საქართველს ატლანტიკური საბჭო;
  • საფარი;
  • საქართველოს გაეროს ასოციაცია;
  • ეკონომიკური პოლიტიკის კვლევის ცენტრი;
  • სამოქალაქო განვითარების სააგენტო;
  • სამართლიანი არჩევნებისა და დემოკრატიის საერთაშორისო საზოგადოება;
  • ინიციატივა მოწყვლადი ჯგუფების რეაბილიტაციისათვის;
  • ინფორმაციის თავისუფლების განვითარების ინსტიტუტი.

თიბისი ბანკის დამფუძნებლებს, მამუკა ხაზარაძესა და ბადრი ჯაფარიძეს პროკურატურამ ფულის გათეთრების საქმეზე ბრალი წარუდგინა. ისინი გუშინ, 24 ივლისს დაიბარეს პროკურატურაში ბრალდების დადგენილების წარდგენის მიზნით. პროკურატურა მიმართავს სასამართლოს აღმკვეთი ღონისძიების შეფარდების თაობაზეც. ჯერჯერობით უცნობია, აღმკვეთი ღონისძიების რა ფორმას მოითხოვს პროკურატურა.

ამავე თემაზე: