ვენესუელის უდიდესი ნაწილი ისევ ელექტროენერგიის გარეშეა დარჩენილი. როგორც BBC წერს, 23 შტატიდან მინიმუმ 18-ში ელექტროენერგია არ არის, მათ შორის უშუქოდ დარჩა დედაქალაქი კარაკასი.

ინფორმაციის მინისტრი ხორხე როდრიგესის თქმით, ელექტროენერგიის გათიშვა "ელექტრომაგნიტურმა თავდასხმამ" გამოიწვია და ხელისუფლება ცდილობს, სიტუაცია გამოასწოროს.

ვენესუელაში ელექტროენერგიის პრობლემა მიმდინარე წელს რამდენჯერმე გაჩნდა. მარტში თითქმის ერთი კვირის განმავლობაში მთელ ქვეყანაში შუქი არ იყო, რამაც ქაოსი გამოიწვია. ელექტროენერგიის არ ქონის გამო ქვეყნის დიდ ნაწილს არ მიეწოდებოდა წყალიც. მაშინ პრეზიდენტმა, ნიკოლას მადურომ განაცხადა, რომ ქვეყნის წინააღმდეგ "ელექტრონული ომი" მიმდინარეობს. ქვეყნის თავდაცვის მინისტრმა კი მასობრივ უშუქობაში აშშ დაადანაშაულა.

2019 წლის იანვრის შემდეგ ვენესუელაში მუდმივი არეულობაა. იანვრის ბოლოს ოპოზიციის ლიდერმა და პარლამენტის სპიკერმა, ხუან გუაიდომ კონსტიტუციაზე დაყრდნობით თავი დროებით პრეზიდენტად გამოცხადა. ის მადუროს უზურპატორს უწოდებს და მრავალათასიან აქციებზე მის გადადგომასა და ვადამდელი საპრეზიდენტო არჩევნების ჩატარებას ითხოვს. გუაიდოს ლეგიტიმურობას აღიარებს ლათინური ამერიკისა და დასავლეთის ქვეყნების დიდი ნაწილი, მათ შორის საქართველო. მადუროს მხარს საკონსტიტუციო სასამართლო და არმია უჭერს მხარს. რაც შეეხება საერთაშორისო მხარდაჭერას, მის ლეგიტიმურობას რუსეთი და ჩინეთი აღიარებენ.

ნიკოლას მადუროს პრეზიდენტობის პერიოდში ქვეყანაში გამწვავდა ეკონომიკური კრიზისი, რამდენიმე მილიონი პროცენტით გაუფასურდა ადგილობრივი ვალუტა და ქვეყანაში ჰუმანიტარული კრიზისი შეიქმნა. გაეროს მონაცემებით, 2015 წლის შემდეგ ქვეყნიდან ოთხი მილიონი ადამიანი გაიქცა. ქვეყნის კრიზისში ვენესუელა აშშ-ს სანქციებს ადანაშაულებს.