რამდენიმეთვიანი პაუზის შემდეგ ქართული ოცნების თავმჯდომარე ბიძინა ივანიშვილი მედიასთან გამოჩნდა და განაცხადა, რომ ქართული ოცნება მხოლოდ არჩევნების წინ აქტიურდება, რაც უნდა შეიცვალოს. პოლიტიკაში მეორედ დაბრუნებისა და საპრეზიდენტო არჩევნების წინა პერიოდის მსგავსად, მან კიდევ ერთხელ დადო პირობა რომ პარტიას ხალხთან მეტი კომუნიკაცია ექნება.

"ის, რომ პარტია ქართული ოცნება დემოკრატიული საქართველო ძირითადად არჩევნებიდან არჩევნებამდე არსებობდა და არჩევნებზე აქტიურდებოდა მხოლოდ, ჩვენ ამაზე პრინციპულად უარს ვამბობთ. ყველა დრო, არჩევნების შუალედიც უნდა იყოს არჩევნების მსგავსი და მეტი კომუნიკაცია უნდა გვქონდეს საზოგადოებასთან", — განაცხადა მან.

ივანიშვილმა განმარტა, თუ როგორ აპირებენ პარტიის წევრები "აქტიურობას". მისი თქმით, პარლამენტიდან და საკრებულოებიდან ქართული ოცნების წევრები უკვე გავიდნენ მთიან რეგიონებში ხალხთან შესახვედრად, სექტემბრიდან კი ეს აქტივობა გაიზრდება. მისივე თქმით, აქტივობა მოიცავს ხალხთან შეხვედრას, კითხვებზე პასუხის გაცემას, პოლემიკას ინფრასტრუქტურულ პროექტებზე და ბიუჯეტის გაცნობას.