ეზო ფესტივალი კამპანიას #spendyoursummeringeorgia უერთდება და ტურისტებს ფესტივალის სეზონის დახურვაზე 100 უფასო მოსაწვევს აჩუქებს. ამის შესახებ მზესუმზირა Facebook-ზე წერს.

"ტურისტებს, რომლებიც ჯერ კიდევ ყოყმანობენ, ეწვიონ თუ არა საქართველოს! ეზო ფესტივალი საჩუქრად გასცემს მოსაწვევებს ფესტივალის დახურვისთვის იმ ტურისტებზე, რომლებიც ამ პერიოდში საქართველოში იქნებიან", — აღნიშნავს ფესტივალი.

მათივე თქმით, დააჯილდოებენ პირველ 100 ტურისტს, რომელიც პოსტზე დააკომენტარებს.

"ჩვენ, კომუნა მზესუმზირას გვჯერა, რომ მომავალი დასავლურ ღირებულებებში და იმ ხალხშია, რომელმაც ჩამოაყალიბა ეს ღირებულებები. გვჯერა, რომ ჩვენი მიზნების მიღწევა მხოლოდ მათთან ერთადაა შესაძლებელი", — წერენ ფესტივალის ორგანიზატორები.

საქართველოში ანტისაოკუპაციო აქციები #სირცხვილია მე-16 დღეა მიმდინარეობს. სამოქალაქო პროტესტი რუსი დეპუტატის სერგეი გავრილოვის საქართველოში ვიზიტმა და პარლამენტის თავმჯდომარის სკამიდან რუსულ ენაზე განცხადების გაკეთებამ გამოიწვია. შედეგად, გავრილოვმა საქართველო დატოვა, პარლამენტის თავმჯდომარე გადადგა. რუსეთმა საქართველოს "დასჯა განიზრახა" და სანქციების ბერკეტი აამოქმედა: რუსულ ავიახაზებს საქართველოში ფრენა აუკრძალა, რამდენიმე ღვინის ექსპორტიორი კომპანია დაბლოკა და აქციები "რუსოფობიად" მოიხსენია. ამის პარალელურად, დიპლომატიურმა კორპუსმა და მოქალაქეებმა ტურისტების მოზიდვის მიზნით დაიწყეს კამპანია #spendyoursummeringeorgia.

კამპანიის მიზანია მსოფლიოს მასშტაბით ტურისტებს მიაწვდინონ ხმა რუსულ ემბარგოზე და ჩვენი ტურისტული პოტენციალი გააცნონ. კამპანიას უკვე შეუერთდნენ ქართველი სპორტსმენების, მომღერლების, მსახიობების ნაწილი, დიპლომატიური კორპუსის წარმომადგენლები.