"დიდი მადლობა, რომ აღვიძებთ ადამიანებში მართალს, ნამდვილს და არ გეშლებათ სიმართლე და ღალატი,", — ამ სიტყვებით მიმართა მომღერალმა ნინო ქათამაძემ პარლამენტთან შეკრებილ აქციის მონაწილეებს.

ის მხარდასაჭერად აქციაზე მივიდა და თქვა, რომ, როცა საჭირო იქნება, იქ იდგება აქციის მონაწილეებთან ერთად.

"მე შემიძლია მილიარდი ბოდიში მოგიხადოთ, მაგრამ მინდა, რომ ბევრი ადამიანი მოიყვანოთ, რომ თქვენი ფასეულობები აღიაროს. იმისთვის, რომ თქვენ დაანახოთ, რომ მართლები ხართ. არც ერთი დღე 30 წლის მანძილზე არ ყოფილა რუსეთიდან კეთილი ნაბიჯი და მიხვდი, რომ თქვენ არ უნდა გქონდეთ ემოციური ბმა და თქვენ 100-პროცენტიანი მართლები ხართ, თქვენ ხართ ნამდვილები, არანაირი დიდებისთვის ან გმირობისთვის არ გამიკეთებია არანაირი ნაბიჯი. მე ვიყავი ადამიანი, რომელსაც უნდა დამენახა ან ჩემი სამშობლო ან ჩემი მუსიკალური მოღვაწეობა. ჩემი გული, ჩემი ოჯახის გული ვერ გაუძლებს ამ ქვეყნის უსიყვარულოდ ცხოვრებას და როცა იქნება, საჭირო იმ დროს ვიქნები იქ, სადა თქვენ იქნებით", — მიმართა ნინო ქათამაძემ აქციის მონაწილეებს.

აქციაზე მისვლამდე ნინო ქათამაძემ ფეისბუქზე ბოდიში მოიხადა 22-23 ივნისს რუსეთში სიმღერის გამო და თქვა, რომ რუსეთში აღარასდროს იმღერებს.

ნინო ქათამაძემ რუსეთში ფესტივალ Усадьба Jazz-ზე იმღერა. კონცერტი 22 ივნისს გაიმართა, მაშინ როდესაც თბილისში ანტისაოკუპაციო საპროტესტო აქცია იმართებოდა.

მასობრივი ანტისაოკუპაციო პროტესტის ფონზე, 22 ივნისს ცნობილი გახდა, რომ საქართველოს ავიაკომპანიებს რუსეთში ფრენებს აუკრძალავენ. რუსეთის ტრანსპორტის სამინისტროს ცნობით, შეზღუდვა 8 ივლისიდან ამოქმედდება. მანამდე, 21 ივნისს ვლადიმერ პუტინმა საქართველოს მიმართულებით რუსული ავიაკომპანიების ფრენები აკრძალა. "რუსეთის ნაციონალური უსაფრთხოების უზრუნველსაყოფად" ასე ჰქვია დოკუმენტს, რომელშიც პუტინი აცხადებს, რომ 2019 წლის 8 ივლისიდან რუსულ ავიაკომპანიებს, მათ შორის კომერციულებს დროებით ეკრძალებათ რუსეთის ფედერაციიდან საქართველოს მიმართულებით ფრენა.

თბილისში რამდენიმე დღეა ანტიოკუპაციური მიტინგები მიმდინარეობს. პროტესტი საქართველოში რუსი დეპუტატების, მათ შორის კომუნისტური პარტიის წევრის, სერგეი გავრილოვის ვიზიტმა გამოიწვია, რომელიც პარლამენტის თავმჯდომარის სავარძელში ჩაჯდა. საპროტესტო ტალღის გამო ასამბლეა ჩაიშალა და რუსმა დეპუტატებმა ქვეყანა დატოვეს.