"ბიძინა ივანიშვილს შეეშინდა მშვიდობიანი, მოწესრიგებული, ორგანიზებული, ფართომასშტაბიანი საპროტესტო აქციის და ამას დაუპირისპირდა ბრუტარული ძალა", — ასე გამოეხმაურა ევროპული საქართველოს დეპუტატი, სერგო რატიანი პროკურატურისგან ნიკა მელიას დაკავების მოთხოვნას ბიუროს სხდომაზე.

მისი თქმით, ხელისუფლებას მშვიდობიანი პროტესტის დაძაბვა უნდა და რადიკალიზაციაზე მიდის.

"ერთადერთი საკითხი, რომელიც დღეს უნდა ყოფილიყო განხილული იყო გახარიას გადაყენება. ეს იყო დანაშაული, შესაბამისად, თქვენ იმის გამო ესროლეთ ამ ახალგაზრდებს, რომ მათ გააპროტესტეს კომუნისტი დამპყრობელის შემოშვება. ერთმორწმუნე კომუნისტები ხართ. ერთი დღის განმავლობაში თქვენი პროვოცირებული იყო ყველაფერი. იმ ადამიანებს ესროლეთ, ვინც დაიცვა ქვეყნის ღირსება, პირველად უკანა რიგებში ესროლეთ ადამიანებს და შემდეგ დასდევდით", — განაცხადა რატიანმა.

მისი თქმით, ბრძოლას ბოლომდე მიიყვანენ: "საზოგადოება არის ორგანიზებული და მშვიდობიანი, თქვენ ხართ ბრუტალური ძალა. ისინი არიან პასუხისმგებლობით აღსავსე , თქვენ ხართ უპასუხისმგებლოები; ისინი არიან ადამიანები, რომლებსაც აქვთ ნებისყოფა იმისა, რომ პროვოკაციებს არ წამოეგონ, თქვენ ხართ უნებისყოფოები და ერთი დღე ვერ გაძელით, რომ არ დაგეწყოთ დევნა. როცა მეუბნებით თვალებში ჩამხედეთ, იმ გოგოს ჩახედეთ თვალებში", — განაცხადა სერგო რატიანმა.

ბიურომ ნიკა მელიას დაკავებაზე პროკურატურის მოთხოვნა კომიტეტებს გადაუგზავნა. ამის შესახებ ბიურომ გადაწყვეტილება რამდენიმე წუთის წინ მიიღო.

საქართველოს პროკურატურამ აქციის მიმდინარეობისას ჯგუფური ძალადობის ხელმძღვანელობისა და მასში მონაწილეობისთვის ნაციონალური მოძრაობის დეპუტატს ნიკა მელიას ბრალი წარუდგინა და პატიმრობის ნებართვისთვის საქართველოს პარლამენტს მიმართა.

"ნიკანორ მელია ხვალ დაბარებულია საქართველოს გენერალურ პროკურატურაში მისთვის ბრალდების წარდგენის მიზნით. გენერალურმა პროკურატურამ, საქართველოს პარლამენტის რეგლამენტის შესაბამისად, უკვე აცნობა საკანონმდებლო ორგანოს პარლამენტის წევრის სისხლის სამართლის პასუხისგებაში მიცემის შესახებ და მიმართა ბრალდებულის მიმართ პატიმრობის გამოსაყენებლად თანხმობის მიღების წინადადებით", — ნათქვამია პროკურატურის განცხადებაში.

უწყების ცნობით, საქართველოს გენერალური პროკურატურა და შინაგან საქმეთა სამინისტროს ცენტრალური კრიმინალური პოლიციის დეპარტამენტი აწარმოებს გამოძიებას 2019 წლის 20-21 ივნისს პარლამენტის წინ გამართულ აქციაზე ჯგუფური ძალადობის ორგანიზების, ხელმძღვანელობისა და მასში მონაწილეობის ფაქტზე, საქართველოს სისხლის სამართლის კოდექსის 225-ე მუხლით.

მათივე ცნობით, აღნიშნული გამოძიების ფარგლებში, საქართველოს პარლამენტის წევრის ნიკანორ მელიას მიმართ გამოიკვეთა სისხლის სამართლის კოდექსით გათვალისწინებული დანაშაულის ნიშნები. აქციის მიმდინარეობისას ჯგუფური ძალადობის ხელმძღვანელობის და მასში მონაწილეობისთვის ნიკანორ მელიას მიმართ გამოტანილია ბრალდების დადგენილება საქართველოს სისხლის სამართლის კოდექსის 225-ე მუხლის პირველი და მეორე ნაწილებით.