ერთიანი ნაციონალური მოძრაობის წევრს, დეპუტატ ნიკა მელიას, წარედგინილი ბრალდების დადგენილებით, ოთხიდან ცხრა წლამდე პატიმრობა ემუქრება.

პროკურატურის განცხადებით, აქციის მიმდინარეობისას ჯგუფური ძალადობის ხელმძღვანელობის და მასში მონაწილეობისთვის მელიას მიმართ გამოტანილია ბრალდების დადგენილება სისხლის სამართლის კოდექსის 225-ე მუხლის პირველი და მეორე ნაწილებით.

ამავე მუხლის პირველი ნაწილი გულისხმობს, ჯგუფური მოქმედების ორგანიზებას ან ხელმძღვანელობას, რასაც თან ახლავს ძალადობა, რბევა, სხვისი ნივთის დაზიანება ან განადგურება, იარაღის გამოყენება, იარაღის გამოყენებით ხელისუფლების წარმომადგენლისადმი წინააღმდეგობა ანდა მათზე თავდასხმა. დანაშაული ისჯება თავისუფლების აღკვეთით ვადით ექვსიდან ცხრა წლამდე. მეორე ნაწილი გულისხმობს ამ მუხლის პირველი ნაწილით გათვალისწინებულ ქმედებაში მონაწილეობას, რაც ისჯება თავისუფლების აღკვეთით ვადით ოთხიდან ექვს წლამდე.

საქართველოს პროკურატურამ აქციის მიმდინარეობისას ჯგუფური ძალადობის ხელმძღვანელობისა და მასში მონაწილეობისთვის ნაციონალური მოძრაობის დეპუტატს ნიკა მელიას ბრალი წარუდგინა და პატიმრობის ნებართვისთვის საქართველოს პარლამენტს მიმართა.