ეუთო გმობს გუშინ, 20 ივნისის აქციაზე მედიის წარმომადგენლების მიმართ ძალადობას და მოუწოდებს საქართველოს ხელისუფლებას დაუყოვნებლივ გამოიძიოს ყველა ინციდენტი. ამის შესახებ განცხადება მედიის თავისუფლების საკითხებში ეუთოს წარმომადგენელმა ჰარლემ დეზირმა გაავრცელა.

"მე ვგმობ ძალადობისა და მედიაზე თავდასხმის ყველა ფაქტს, რომელიც მოხდა დემონსტრაციის ღამეს თბილისში, რაც ხელს უშლის პლურალიზმსა და მედიის თავისუფლებას. მედიას აქვს უფლება გააშუქოს საზოგადოებრივი მოვლენები და სამართალდამცავებმა პატივი უნდა სცენ ჟურნალისტებს, რომ თავისუფალ და მშვიდობიან გარემოში შეძლონ პროფესიული მოვალეობის შესრულება", — აღნიშნა ჰარლემ დეზირმა.

ეუთოს ანგარიშის მიხედვით 20 ივნისს განვითარებული მოვლენების დროს, სხვადასხვა დაზიანება მიიღო 30-ზე მეტმა მედია საშუალების წარმომადგენელმა, მათ შორის On.ge-ს რადიო თავისუფლების, რუსთავი 2-ის, პირველი არხის, TV პირველის, ნეტგაზეთის, Civil.ge-ს, მაესტროს, აჭარის ტელევიზიის, როუტერსის, კავკაზსკი უზელის, OC მედიას, Interpressnews.ge-ისა და სხვა. განცხადებაში წერია, რომ ისინი დაშავდნენ მაშინ, როცა სპეცრაზმმა რეზინის ტყვიების სროლა დაიწყო და დაუზიანდათ ტექნიკა. ეუთო წერს, რომ Civil.ge-ს ფოტოგრაფ გურამ მურადოვს 11 რეზინის ტყვია მოხვდა, რუსთავი 2-ის რეპორტიორმა, თამარ ბაღაშვილმა ხელი მოიტეხა, ხოლო რუსთავი 2-ის დაცვამ, გიორგი სულაშვილმა დაკარგა თვალი და ჰქონდა ყბის ძვლის მოტეხილობა.

ეუთომ ასევე მოუწოდა ხელისუფლებას მომავალში მოახდინოს მსგავსი შემთხვევების პრევენცია და დაიცვას ჟურნალისტების უსაფრთხოება.

20 ივნისის აქცია

პარლამენტის წინ აქციის დაშლის დროს 240 ადამიანი დაშავდა, მათგან 80 სამართალდამცავია. ჯანდაცვის სამინისტროს თქმით, ამ დრომდე კლინიკაში 102 პაციენტი რჩება. ერთის მდგომარეობა მძიმეა, ორს კი თვალი ამოაჭრეს.

მოქალაქეების პროტესტი საქართველოში რუსი დეპუტატების ჩამოსვლას მოჰყვა. მართლმადიდებლობის საპარლამენტთაშორისო ასამბლეის ფარგლებში, რომელიც 19-22 ივნისს უნდა გამართულიყო, საქართველოში 25 ქვეყნის დელეგაცია ჩამოვიდა, მათ შორის რუსეთის დუმის სამი დეპუტატი. ასამბლეის წაყვანის დროს სერგეი გავრილოვი საქართველოს პარლამენტის თავმჯდომარის სკამზე იჯდა, რასაც ოპოზიციისა და სამოქალაქო სექტორის მხრიდან პროტესტი მოჰყვა. ოპოზიციის წევრები პლენარულ სხდომათა დარბაზში შევიდნენ და თავმჯდომარის ადგილი დაიკავეს, გავრილოვს კი დარბაზში შესვლის უფლებას არ აძლევდნენ. ისინი ამბობდნენ, რომ თავმჯდომარის ადგილას ოკუპანტი ქვეყნის დეპუტატი, რომელმაც აფხაზეთი და ცხინვალი დამოუკიდებელ ქვეყნებად აღიარა, არ უნდა იჯდეს.

საბოლოოდ, ასამბლეის სესია შეწყდა და რუსმა დეპუტატებმა ქვეყანა დატოვეს. ხელისუფლების წარმომადგენლები ამბობდნენ, რომ სხდომა ასამბლეის გენერალურ მდივანს, ბერძენ დეპუტატს უნდა წაეყვანა და ეს პროტოკოლის მიხედვით იყო განსაზღვრული. მათ ისიც ახსენეს, რომ გავრილოვის მხრიდან ეს იყო მიზანმიმართული პროვოკაცია.

გავრილოვის მიერ სკამის დაკავებას საპროტესტო ტალღა მოჰყვა. მოქალაქეებმა ანტისაოკუპაციო აქციები მოაწყეს. დღის ბოლოს კი პარლამენტის წინ შეიკრიბნენ. ოპოზიციის წევრები ითხოვდნენ ირაკლი კობახიძის, ვახტანგ გომელაურისა და გიორგი გახარიას გადადგომას. აქციის მონაწილეების ნაწილმა პარლამენტში შესვლა სცადა და ცენტრალურ გამზირზე მობილიზებულმა სპეცრაზმმა მათი დაშლა დაიწყო.

სამართალდამცავებმა მოქალაქეების წინააღმდეგ რეზინის ტყვიები, ცრემლსადენი გაზი და წყლის ჭავლი გამოიყენეს. დაშავებულია ათეულობით მოქალაქე, ორს თვალი აქვს დაკარგული. დაკავებულების ზუსტი რაოდენობა უცნობია.