საზეიმო ღონისძიებები წელს საქართველოსა და მსოფლიოს არაერთ ქალაქში გაიმართა. მათი მთავარი მესიჯი იყო #გააზიარეცოდნა და #ესდღეჩვენია.

თბილისში, რუსთაველისა და თავისუფლების გამზირზე ათეულობით საინფორმაციო სტენდი, ფოტოგამოფენა, შემეცნებითი თამაშები და გასართობი ადგილები მოეწყო. აქ შეგეძლოთ ყველაფერი გაგეგოთ პირველ რესპუბლიკაზე და არამხოლოდ. ბევრგან ნახავდით ინფორმაციას სხვადასხვა სფეროში წარმატებულ ქართველებზე.

იქვე იდგა ათეულობით დახლი, სადაც ეროვნული თემატიკის პროდუქცია იყიდებოდა.

დილის ათი საათიდან ქალაქის ცენტრში ათასობით ადამიანი ფუსფუსებდა. რიგები იდგა სასუსნავებისა და ნაყინის დახლებთან. უსაქმოდ არ დარჩენილან მხატვრებიც, რომლებიც ბავშვებს სხვადასხვა სუპერგმირებს ამსგავსებდნენ ან საქართველოს დროშით უფერადებდნენ ლოყებს.

ყველა კუთხეში ნახავდით მომღიმარ გამყიდველებს, რომლებიც საქართველოს დროშებს გთავაზობდნენ.

თითქმის ყოველი ფეხის ნაბიჯზე ისმოდა მუსიკა, რადიკალურად სხვადასხვა ჟანრის, მაგრამ ყველამ იპოვა თავისი მსმენელი. დღეს რუსთაველზე ისმოდა ტექნო, ქართული ფოლკროლი, უცხოური შოუბიზნესის წარმომადგენელთა ქავერები და საბავშვო სიმღერები.

განსაკუთრებული ხმაური და ხალხმრავლობა იყო მოსწავლე ახალგაზრდობის სასახლესთან. აქ ათეულობით ანიმატორი ზღაპრის გმირებს აცოცხლებდა და ბავშვებთან ერთად პოზირებდა.

იქ, სადაც 101 წლის წინ ნოე ჟორდანია, ნოე რამიშვილი, აკაკი ჩხენკელი და სხვა საზოგადო მოღვაწეები იდგნენ, ახლა ფიფქია, კონკია, მეკობრეები და კლოუნები სეირნობდნენ.

განსაკუთრებულ ყურადღებას იქცევდნენ ზეიმზე მყოფი სამხედრო მოსამსახურეები, რომლებიც ობიექტივს სამხედრო სალმით, გაშლილი მხრებითა და ამაყი მზერით ხვდებოდნენ.

წელს თბილისში გასართობი და შემეცნებითი სივრცის ნახვა შეეძლო ნებისმიერი ასაკის პირს.

თუმცა, პრივილეგირებულ მდგომარეობაში, რა თქმა უნდა, ბავშვები აღმოჩნდნენ.

აქ ყველაფერი იყო მათთვის: სათამაშოები, ტკბილეული, მუსიკა და თავისუფლება. ასე აღმოჩნდა ეს დღე მათი.

ისინი ცეკვავდნენ

ხტუნავდნენ

თამაშობდნენ

ან თამაშის წესებში ერკვეოდნენ

ფარიკაობდნენ

არქეოლოგიურ გათხრებს აწარმოებდნენ

ექსპერიმენტებს ატარებდნენ

ახალ ხელობას ეუფლებოდნენ

იღლებოდნენ და წუწუნებდნენ

და ქართულ ჯავშანტექნიკას გამძლეობაზე ამოწმებდნენ

სახალხო ზეიმის პარალელურად, თავისუფლების მოედანზე ახალწვეულები ფიცს დებდნენ. ღონისძიებას ესწრებოდნენ ქვეყნის პირველი პირები, მართლმადიდებელი ეკლესიის პატრიარქი და მოწვეული სტუმრები.

დღის პირველ ნახევარში სიცხის მიუხედავად რუსთაველზე ხალხმრავლობა იყო, მაგრამ ძლიერმა წვიმამ, რომელიც სულ რამდენიმე წუთი გაგრძელდა ხალხის რაოდენობა შეამცირა. უამინდობას გეგმებზე არ უმოქმედია და ღონისძიებები გაგრძელდა.

17 საათსა და 10 წუთზე, ზუსტად იმ დროს, როცა ეროვნულმა ყრილობამ დამოუკიდებლობა გამოაცხადა საზოგადოებრივ ტრანსპორტში საქართველოს ჰიმნი ჩაირთო. ჰიმნის დასასრულს ოვაციებთან ერთად ისმოდა: საქართველოს გაუმარჯოს.