რუსეთის პრეზიდენტმა, ვლადიმერ პუტინმა მოითხოვა, რომ უახლოეს პერიოდში მეხუთე თაობის 76 გამანადგურებელი, Su-57 შეიძინონ. ეს იმაზე ხუთჯერ მეტია, ვიდრე დაგეგმილი იყო.

"2027 წლამდე 16 თვითმფრინავის შესყიდვა იგეგმებოდა. გუშინ სიტუაცია გავაანალიზეთ, თავდაცვის მინისტრმა შემატყობინა, რომ კომპანიასთან შევთანხმდით და თითქმის 20 პროცენტით შეამცირა იარაღის ფასი. ჩვენ უფრო მეტი საბრძოლო მანქანის და ამ თაობის იარაღის შესყიდვის საშუალება მოგვეცა", — განაცხადა პუტინმა სამხედრო ავიაციის განვითარების სხდომაზე.

გამოცემა კომერსანტის ინფორმაციით, კონტრაქტი 2019 წლის აგვისტოში გაფორმდება და მისი ღირებულება 170 მილიარდი რუბლი (2,6 მილიარდ დოლარზე მეტი) იქნება.

Su-57 მეხუთე თაობის რუსული მრავალფუნქციური გამანადგურებელია. მეხუთე თაობის გამანადგურებლის შექმნაზე რუსული მწარმოებლები 2000-იანების დასაწყისში საუბრობდნენ. პირველად Su-57-ის გაშვება 2006 წელს იგეგმებოდა, თუმცა ვადებმა 2010 წლისთვის გადაიწია. რუსეთის თავდაცვის სამინისტრომ განაცხადა, რომ Su-57-მა გამოცდების პროგრამა სირიაში გაიარა.