რუსთავი 2-ის ცხრაპროცენტიანი წილის მფლობელის, ნინო ნიჟარაძის ადვოკატი, გიორგი ყავლაშვილი ამბობს, რომ შესაძლოა, ტელეკომპანიის გაკოტრების გარემოება არსებობდეს. მან პრესკონფერენციაზე საქართველოს კომუნიკაციების ეროვნული კომისიის დასკვნა და სავარაუდო გაკოტრების სქემა წარადგინა.

ყავალაშვილი კომისიის დასკვნაზე დაყრდნობით აცხადებს, რომ 2016 წლის მდგომარეობით კომპანია ინტერმედიას, რომელიც ტელეკომპანიის რეკლამას ექსკლუზიურად ყიდის, შემოსავლის სახით 7 პროცენტი რჩებოდა, 2017 წლიდან კი ეს თანხა 30 პროცენტამდე გაიზარდა.

"ჩვენ გვაქვს კითხვები ამასთან დაკავშირებით, რატომ მოხდა საშუამავლო კომპანიის შემოსავლების ზრდა 7-დან 30 პროცენტამდე, მაშინ როცა კომუნიკაციების ეროვნული კომისიის დასკვნაში წერია, რომ ეს თანხები პირდაპირ მოაკლდა ტელეკომპანიას", — ამბობს ადვოკატი.

მან ამ კონტრაქტს საზიანო უწოდა და ამბობს, რომ წელიწადში არხმა, დაახლოებით, მილიონი დაკარგა. გიორგი ყავალაშვილი ხაზს უსვამს, რომ ინტერმედიას მფლობელები, მიშა მშვილდაძე და ზურაბ გუმბარიძე არიან ფორმულა პროესკო ფრდოდაქშენის დამფუძნებლები. აღნიშნული კომპანია კი ტელეკომპანია მესამეს წილების ნახევრის მფლობელია. წილების მეორე ნახევარს კი რუსთავი 2-ის იურისტი, დიმიტრი საძაგლიშვილი ფლობს.

"ტელეკომპანია მესამე მედიაბაზარზე არის რუსთავი 2-ის კონკურენტი არხი. თავისთავად, ყველა მედიასივრცეში, სადაც რუსთავი 2 არ იქნება დამფუძნებელი არსებული სუბიექტი მის კონკურენტს წარმოადგენს. სახეზე გვაქვს აშკარად, რომ რუსთავი 2-დან წასული თანხებით ფინანსდება ინტემედია, ფორმულა პროესკო ფროდაქშენი და ტელეკომპანია მესამე", — აღნიშნავს ადვოკატი.

მისივე თქმით, ინტერმედიაში "გაუმართლებრად დიდი თანხები მიდის" და ამ მოქმედებებთან დაკავშირებით ნინო ნიჟარაძე ინფორმირებული არ იყო. თავისი სიტყვების გასამყარებლად კი მან არხის გენერალური დირექტორის, ნიკა გვარამიას განცხადება მოიყვანა, სადაც ის ამბობს, რომ თუ რუსთავი 2 დაიხურება, გაიხსნება ახალი არხი იგივე სახეებით.

"ერთადერთი ვარაუდი, რომელიც იურისტს შეიძლება გაუჩნდეს და რაიმეს მტკიცების ფორმატში გაცხადება რთულია, ხომ არ არის ეს რუსთავი 2-ის მიზანმიმართული გაკოტრების მცდელობა. სხვა რამით ამის ახსნა შეუძლებელია. გაკოტრება და ვალაუვალობა ერთმანეთთან არის დაკავშირებული და ვალდებულიც არის საწარმოს ხელმძღვანელი, რომ როდესაც კომპანია ვალაუვალი ხდება, დაიწყოს გაკოტრების საქმე", — აცხადებს გიორგი ყავალაშვილი.

ადვოკატი ამბობს, რომ ნინო ნიჟარაძეს წილების გაყიდვა კვლავ სურს, რაც დღევანდელი მოცემულობით შეუძლებელია:

"მხარის მიერ ზიანის მოთხოვნის და ზიანის ანაზღაურება კავშირში არ არის იმ აკრძალვებთან, რომელიც სტრასბურგის სასამართლომ დაადგინა და რასაც ახმოვანებს ქალბატონი თეა წულუკიანი".