რუსეთის პრეზიდენტმა, ვლადიმერ პუტინმა გამოცდა განკარგულება, რომლითაც დონეცკისა და ლუგანსკის თვითგამოცხადებული რესპუბლიკების მცხოვრებლები რუსეთის მოქალაქეობას გამარტივებული წესით მიიღებენ.

Reuters-ის ცნობით, კრემლის ოფიციალურ გვერდზე გადაწყვეტილება 24 აპრილს გამოქვეყნდა. განკარგულება გააკრიტიკეს როგორც უკრაინაში, ისე საერთაშორისო დონეზე.

უკრაინის საგარეო საქმეთა მინისტრმა ამ გადაწყვეტილებას "აგრესია" და "ჩარევა" უწოდა. დასავლელმა დიპლომატებმა რადიო თავისუფლებას უთხრეს, რომ ეს "განსაკუთრებით პროვოკატორული ნაბიჯია".

განკარგულების მიხედვით, არაღიარებული რესპუბლიკების მცხოვრებლების მხრიდან რუსეთის მოქალაქეობის მიღების შესახებ განაცხადს 3 თვის ვადაში განიხილავენ.

განკარგულებაში ნათქვამია, რომ მისი მიზანი "ადამიანის უფლებების დაცვაა" და ეს ნაბიჯი დამყარებულია "საერთაშორისო პრინციპებსა და საერთაშორისო სამართლის ნორმებზე".

პუტინის თანაშემწემ ვლადისლავ სურკოვმა ამ გადაწყვეტილებას "განსაკუთრებით მნიშვნელოვანი" უწოდა. მან ასევე განაცხადა, რომ რუსეთი გრძნობს პასუხისმგებლობას იმ ადამიანებზე, რომლებიც "რუსულად საუბრობენ და ფიქრობენ და კიევის რეჟიმის რეპრესიული მოქმედებების გამო არიან მძიმე სიტუაციაში".

განკარგულების გასაჯაროვების შემდეგ, უკრაინის საგარეო საქმეთა მინისტრმა პავლო კლიმკინმა ტვიტერზე დაწერა, რომ "რუსეთის გადაწყვეტილება პასპორტებთან დაკავშირებით უკრაინის ოკუპირებულ ტერიტორიაზე არის მისი აგრესიის გაგრძელება უკრაინის შიდა საზღვრებში".