სომხეთის პრემიერ-მინისტრი ნიკოლ პაშინიანი უკრაინის არჩეულ პრეზიდენტს, ვოლოდიმირ ზელენსკის ურჩევს, რომ ვლადიმერ პუტინთან ურთიერთობისას მაქსიმალურად გულწრფელი იყო. ამის შესახებ მან გამოცემა РБК-სთან ინტერვიუს დროს განაცხადა.

"არ მგონია, რომ მას გაუჭირდება [პუტინთან ურთიერთობა]. აქ არსებობს პირობა: თუ იქნები პირდაპირი, გულწრფელი რთული არ იქნება. საჭიროა იყო პირდაპირი და გულწრფელი", — აღნიშნა სომხეთის პრემიერ-მინისტრმა.

21 აპრილს უკრაინაში საპრეზიდენტო არჩევნების მეორე ტური გაიმართა, მსახიობმა ვოლოდიმირ ზელენსკიმ მოქმედ პრეზიდენტ პეტრო პოროშენკოს მოუგო. ეგზიტპოლების გამოცხადების შემდეგ პოროშენკომ მარცხი აღიარა და ზელენსკის გამარჯვება მიულოცა.

ზელენსკის გამარჯვება მიულოცეს დასავლეთის ქვეყნების ლიდერებმა, მათ შორის, საქართველოს პრემიერ-მინისტრმა მამუკა ბახტაძემ. რუსეთის ფედერაციიდან ზელენსკისთვის ჯერ არავის მიულოცავს. არჩევნებს გამოეხმაურა პრემიერ-მინისტრი დიმიტრი მედვედევი და აღნიშნა, რომ "ურთიერთობების გაუმჯობესების შანსები ჯერ კიდევ არსებობს".

ამავე თემაზე: