უკრაინის საპრეზიდენტო არჩევნებში ვოლოდიმირ ზელენსკის გამარჯვებას რუსეთის პრემიერ-მინისტრი, დიმიტრი მედვედევი გამოეხმაურა. ფეისბუქზე ის წერს, რომ ახალი პრეზიდენტი რუსეთთან ურთიერთობისას წინასაარჩევნო რიტორიკას გააგრძელებს — "გაიმეორებს ცნობილ იდეოლოგიურ ფორმულებს, რომელიც მოსახლეობის სხვადასხვა ჯგუფზეა ორიენტირებული.

გარდა ამისა, ის აღნიშნავს, რომ ორ ქვეყანას შორის ურთიერთობების გაუმჯობესების შანსები ჯერ კიდევ არსებობს:

"მთავარი, რაც შეიძლება უკრაინის ახალ პრეზიდენტს უსურვო, კეთილგონიერებაა. და რა თქმა უნდა, გააზრება ჩვენი ქვეყნების ხალხთა ურთიერთობის ფასეულობებისა, რაც პოლიტიკურ კონიუნქტურაზე მაღლა უნდა იყოს".

21 აპრილს უკრაინაში საპრეზიდენტო არჩევნების მეორე ტური გაიმართა. ცესკოს წინასწარი შედეგებით, მსახიობმა ვოლოდიმირ ზელენსკიმ 73,15 პროცენტი მოიპოვა, ხოლო მოქმედმა პრეზიდენტმა, პეტრო პოროშენკომ — 24,52. ეგზიტპოლების გამოცხადების შემდეგ პოროშენკომ მარცხი აღიარა და ზელენსკის გამარჯვება მიულოცა. ზელენსკის გამარჯვება უკვე მიულოცეს დასავლეთის ქვეყნების ლიდერებმა, მათ შორის, საქართველოს პრემიერ-მინისტრმა მამუკა ბახტაძემ. რუსეთის ფედერაციიდან ზელენსკისთვის ჯერ არავის მიულოცავს.