აშშ-მ ირანის ისლამური რევოლუციის მცველთა კორპუსი ტერორისტულ დაჯგუფებად გამოაცხადა. ეს პირველი შემთხვევაა, როდესაც აშშ-მ სხვა ქვეყნის სამხედრო დანაყოფი ტერორისტულ დაჯგუფებად გამოაცხადა.

ამერიკის მოქალაქეებს, კომპანიებსა და სახელმწიფო ორგანიზაციებს ეკრძალებათ, რომ ტერორისტულ ორგანიზაციებთან რაიმე სახის ურთიერთობა ჰქონდეთ. ამ სიის წევრების აქტივები კი აშშ-ში გაიყინება.

ისლამის რევოლუციის მცველთა კორპუსი ირანის სამხედრო ძალების ნაწილია, რომელიც 1979 წელს რუჰოლა ხომეინის მომხრეებმა შექმნეს. კორპუსი მონაწილეობას იღებდა ირანი-ერაყის ომებში და "ჰესბოლას" ჩამოყალიბებაში.

სხვადასხვა მონაცემით, კორპუსში 125 ათასი ადამიანი შედის. მათ აქვთ საკუთარი სახმელეთო, სასაზღვრო და საჰაერო ძალები, სპეცდანაყოფები და სადაზვერვო სამსახური. ეს ყველაფერი ირანის სამხედრო ძალების პარალელურად ფუნქციონირებს.