შინაგან საქმეთა სამინისტროს განცხადებით, ბათუმში ტურისტებისთვის თანხის ჯგუფურად გამოძალვის ბრალდებით ხუთი პირია დაკავებული. უწყების ცნობით, გამოძიებამ დაადგინა, რომ დაკავებულები სხვადასხვა დროს ბათუმში მდებარე ორ კლუბში, სიცოცხლის მოსპობისა და ჯანმრთელობის დაზიანების მუქარით, უცხო ქვეყნის მოქალაქეებს სისტემატურად სთხოვდნენ არარსებული მენიუს საფასურს და შეუსაბამოდ დიდ თანხას ახდევინებდნენ.

შსს აცხადებს, რომ სულ ბრალდებულებმა 8 ტურისტს 2 100 ევრო, 5 123 ლარი და 10 800 თურქული ლირა გამოსძალეს. გამოძიება ჯგუფურად ჩადენილი გამოძალვის ფაქტზე, საქართველოს სსკ-ს 181-ე მუხლის მე-2 ნაწილის ა ქვეპუნქტით მიმდინარეობს. დანაშაული 4-დან 7 წლამდე ვადით თავისუფლების აღკვეთას ითვალისწინებს.