უკრაინის საპრეზიდენტო კანდიდატების, პეტრო პოროშენკოსა და ვოლოდიმირ ზელენსკის პირველი დებატები შესაძლოა, კიევის ოლიმპიურ სტადიონზე გაიმართოს, რომელზეც 70 ათასი ადამიანი ეტევა.

სტადიონზე დებატების ჩატარების იდეა ზელენსკის ეკუთვნის. მანამდე მას დებატები არ გაუმართავს და არც რომელიმე პოლიტიკურ გადაცემაში ყოფილა ინტერვიუზე

არჩევნების პირველი ტურის შემდეგ პეტრო პოროშენკომ განაცხადა, რომ მასსა და ზელენსკის შორის დებატები უნდა შემდგარიყო. ზელენსკიმ ოპონენტს რამდენიმე პირობა წაუყენა და შესაბამისი ვიდეო ფეისბუქზე გამოაქვეყნა. გარდა იმისა, რომ დებატები ოლიმპიურ სტადიონზე უნდა შემდგეს, მედიასაშუალებებს პირდაპირი ტრანსლირების უფლება უნდა ჰქონდეთ, ხოლო დებატების მონაწილეებმა სამედიცინო შემოწმება გაიარონ, რათა "ხალხს დაუმტკიცონ, რომ მათ შორის არც ნარკოტიკებზე და ალკოჰოლზე დამოკიდებულები არ არინ".

ზელენსკის გამოწვევა პოროშენკომ მიიღო და განაცხადა, რომ დებატებისთვის მზადაა. კანონის მიხედვით, დებატები მეორე ტურამდე ბოლო პარასკევს, საღამოს საათებში უნდა გაიმართოს. ამავე დროს, კიევის ოლიმპიური სტადიონი აცხადებს, რომ დებატების ჩატარებისთვის მათთვის ჯერ არ მიუმართავთ.

31 მარტს უკრაინაში საპრეზიდენტო არჩევნები გაიმართა. ცენტრალური საარჩევნო კომისიის ინფორმაციით, მეორე ტურში ერთმანეთს ვოლოდიმირ ზელენსკი (30,24%) და პეტრო პოროშენკო (15,95%) დაუპირისპირდებიან. უკვე ცნობილია, რომ მესამე ადგილას გასული იულია ტიმოშენკო მეორე ტურში არც ერთ კანდიდატს მხარს არ დაუჭერს.

ამავე თემაზე: