უკრაინის ყოფილი საპრეზიდენტო კანდიდატი და პარტია ბატკივშინას ლიდერი, იულია ტიმოშენკო საპრეზიდენტო არჩევნებში პეტრო პოროშენკოს ან ვლადიმერ ზელენსკის მხარდაჭერას არ აპირებს. ამის შესახებ მან პრესკონფერენციაზე განაცხადა.

"უკრაინის წინაშე გამოწვევები ძალიან დიდია. მიმაჩნია, რომ ვერც ერთი კანდიდატი, რომელიც ცესკოს გადაწყვეტილებით არჩევნების მეორე ტურში იქნება, ამ გამოწვევებს ვერ გაუმკლავდება, ვერ შეაჩერებს ომსა და უბედურებას", — განაცხადა ტიმოშენკომ.

გარდა ამისა, ტიმოშენკო ამბობს, რომ შედეგები, რომლებიც უშუალოდ პოროშენკოს ეხება, გაყალბებულია.

31 მარტს უკრაინაში საპრეზიდენტო არჩევნები გაიმართა. ცენტრალური საარჩევნო კომისიის ინფორმაციით, მეორე ტურში ერთმანეთს ვლადიმერ ზელენსკი (30,26%) და პეტრო პოროშენკო (15,92%) დაუპირისპირდებიან. მეორე ტური 21 აპრილს ჩატარდება.