ვენესუელის პრეზიდენტის, ნიკოლას მადუროს მომხრეებმა პარლამენტის ოპოზიციონერ თავმჯდომარეს, ხუან გუაიდოს დეპუტატის იმუნიტეტი ჩამოართვეს.

როგორც Associated Press წერს, გადაწყვეტილება მადუროს მიერ ჩამოყალიბებულმა საკონსტიტუციო ასამბლეამ მიიღო, რომელიც ოპოზიციური პარლამენტის საპირწონედ შეიქმნა. მადუროს საკანონმდებლო ორგანოში განაცხადეს, რომ იმუნიტეტის ჩამორთმევით ხუან გუაიდოს წინააღმდეგ სასამართლო დავის დაწყება იქნება შესაძლებელი.

აღნიშნული გადაწყვეტილება ვენესუელის კანონებს ეწინააღმდეგება, რადგან დეპუტატის მანდატის ჩამორთმევა უნდა დაამტკიცოს პარლამენტმა, რომლის სპიკერი თვითონ გუაიდოა.

მარტის ბოლოს ხუან გუაიდოს კორუფციაში დასდეს ბრალი და 15 წლის საჯარო სამსახურში თანამდებობის დაკავება აუკრძალეს, ამავე დროს, საკონსტიტუციო ასამბლეამ ის სპიკერობიდან გადააყენა. ოპოზიციონერი, რომელსაც ლათინო-ამერიკული და ევროპის ქვეყნების დიდი ნაწილის ქვეყნის ლეგიტიმურ მმართველად მიიჩნევს, აღნიშნულ გადაწყვეტილებას არალეგიტიმურს უწოდებს.

მანამდე მადუროს მხარდამჭერმა უზენაესმა სასამართლომ გუაიდოს ქვეყნიდან გასვლა აუკრძალა, თუმცა მან ეს აკრძალვა დაარღვია.