სოლიდარობის ქსელი თბილისის მერის კახა კალაძის განცხადებას პასუხობს და აცხადებს, რომ "კალაძე ხელისუფლების სხვა წევრებთან ერთად თავს არიდებს მშრომელებთან შეხვედრას".

ამავე განცხადებაში ნათქვამია, რომ ისინი არა ახალგაზრდების ჯგუფი, არამედ დამოუკიდებელი პროფესიული კავშირის წევრები არიან.

"შესაბამისად, განვითარებულ მოვლენებს და ქვეყანაში არსებულ მომაკვდინებელ სამუშაო პირობებს პირველ რიგში სწორედ დასაქმებულები აპროტესტებდნენ. ის ადამიანები, რომლებიც ყოველდღიურად არიან საფრთხის ქვეშ სამუშაო ადგილებზე და რომლებიც მინიმალური ანაზღაურების ნაცვლად ფაქტობრივად სწირავენ სიცოცხლეს", — ვკითხულობთ განცხადებაში.

სოლიდარობის ქსელის პოზიციით, აქციის ორგანიზატორები არ ყოფილან პოლიტიკოსები, მიუხედავად იმისა, რომ "ზოგიერთმა პოლიტიკოსმა და ჯგუფმა სცადა არსებული პროტესტის საკუთარი პოპულისტური მიზნების განხორციელების პლატფორმად გამოყენება".

"თუმცა ჩვენ, სოლიდარობის ქსელმა, აღნიშნული არ დავუშვით და არც შემდგომში დავუშვებ", ნათქვამია განცხადებაში.

თბილისის მერის, კახა კალაძის თქმით, გუშინ ჭავჭავაძის #5-ში დაღუპული ორი მუშის სოლიდარობის აქციას "პოლიტიკური შემადგენელი ჰქონდა".

გუშინ, პირველ აპრილს სოლიდარობის ქსელის ორგანიზებით შრომის უსაფრთხოების მოთხოვნით აქცია-მსვლელობა გაიმართა. აქციის მონაწილეები საქართველოს კანცელარიასთან შეიკრიბნენ და მსვლელობით ჭავჭავაძის #5-ისკენ გაემართნენ. დემონსტრანტების ოდენობის გამო გზის სავალი ნაწილიც გადაიკეტა.

აქციაზე პოლიცია და დემონსტრანტები ერთმანეთს რამდენჯერმე დაუპირისპირდნენ. პოლიციისთვის წინააღმდეგობის გაწევის მუხლით 6 პირი დააკავეს, ექვსივე გუშინ, გვიან ღამით ხელწერილის საფუძველზე გაათავისუფლეს. დაკავებულებს შორის იყვნენ, კონსტიტუციონალისტი ვახუშტი მენაბდე და თეთრი ხმაურის მოძრაობის წევრი დავით სუბელიანი.

აქციის მონაწილეებმა პასუხისმგებელ პირებთან შეხვედრა მოითხოვეს. თბილისის მერმა კახა კალაძემ სამუშაო ფორმატში შეხვედრის მზაობა გამოხატა, თუმცა დემონსტრანტები არ დათანხმდნენ. აქცია კახა კალაძის სახლთან დასრულდა და შემდგომი აქტივობების განხორციელების მიზნით მოძრაობის შექმნა დაანონსდა.