41 წლის კომედიანტი ვლადიმერ ზელენსკი უკრაინის პრეზიდენტობისთვის მოქმედ პრეზიდენტთან, პეტრო პოროშენკოსთან ერთად მეორე ტურში იბრძოლებს. უკრაინის ცენტრალურ საარჩევნო კომისია ხმების 53 პროცენტზე მეტი აქვს დათვლილი:

• ვლადიმერ ზელენსკი — 30,23%;
• პეტრო პოროშენკო — 16,61;
• იულია ტიმოშენკო — 13,08;
• იური ბოიკო — 11,49;
• ანატოლი გრიცენკო — 7,13.

31 მარტს უკრაინაში საპრეზიდენტო არჩევნების პირველი ტური გაიმართა. ევრომაიდანის შემდეგ ეს მეორე საპრეზიდენტო არჩევნებია. თავიდანვე არჩევნების ფავორიტი კანდიდატები იყვნენ პეტრო პოროშენკო, ოპოზიციონერი იულია ტიმოშენკო და შოუმენი ვლადიმერ ზელენსკი. როგორც ქვეყნის შინაგან საქმეთა სამინისტრო წერს, არჩევნებმა სერიოზული დარღვევების გარეშე ჩაიარა.

წინასწარი შედეგებით, პოროშენკომ უკრაინის აღმოსავლურ რეგიონებში, მათ შორის ლვოვში გაიმარჯვა. პრორუსმა კანდიდატმა, იური ბოიკომ ქვეყნის აღმოსავლეთით, დონბასისა და დონეცკის რეგიონებში მოიპოვა ყველაზე მეტი ხმა. ხოლო ვლადიმერ ზელენსკიმ ხმების დიდი რაოდენობა უკრაინის ცენტრალურ და დასავლეთ რამდენიმე რეგიონში მოიპოვა.

პირველი ტურის შედეგების გამოცხადების შემდეგ პეტრო პოროშენკომ განაცხადა, რომ ამომრჩევლებმა "მოსკოვის სცენარი ჩაშალეს". როგორც ზელენსკიმ განუცხადა ჟურნალისტებს, მისთვის სულ ერთია ვისთან ერთად იქნება მეორე ტურში.

საპრეზიდენტო არჩევნების მეორე ტური 21 აპრილს ჩატარდება.

ზელენსკის პოლიტიკური კურსი

ვლადიმერ ზელენსკი ყველაზე ახალგაზრდა და ახალბედა კანდიდატია. ზელენსკი წინასაარჩევნო პერიოდში აცხადებდა, რომ უკრაინის პრეზიდენტის ოფისში იგი მხოლოდ ერთი ვადით დარჩება და მეორე ვადაზე კენჭისყრას არც შეეცდება. გამარჯვების შემთხვევაში, პირველივე კანონით ზელენსკი პირდაპირი დემოკრატიის დამყარებას შეეცდება. მისი მიზანია, ხელისუფლების წინაშე არსებული ამოცანები ხალხმა პირდაპირი წესით, რეფერენდუმით განსაზღვროს.

ვლადიმერ ზელენსკის პრიორიტეტებშია, სოციალური პროგრამები და სახელმწიფო მხარდაჭერის გაზრდა მოსახლეობის გაჭირვებული ნაწილისთვის. საარჩევნო პროგრამის მიხედვით, უკრაინა მსოფლიოში წამყვან სასურსათო ეკო სუპერმარკეტად უნდა იქცეს. ასევე, ზელენსკი დონბასისა და ლუგანსკის რეგიონში კონფლიქტის მშვიდობიანი გზით გადაჭრის პირობას დებს.

31 მარტს საარჩენო უბანზე მისვლისას ჟურნალისტის კითხვის პასუხად მან საქართველოს ყოფილი პრეზიდენტის დიპლომატია შეაქო და განაცხადა, რომ მიხეილ სააკაშვილს უკრაინის მოქალაქობა უნდა დაუბრუნდეს.

მოქმედ პრეზიდენტს პეტრო პოროშენკოს წინასაარჩევნოდ სწორედ ამომრჩევლების 17 პროცენტის მხარდაჭერას უწინასწარმეტყველებდნენ. იგი პრეზიდენტად 2014 წლის ევრომაიდნის მოვლენების შემდეგ აირჩიეს. მისი მთავარი დაპირება რუსეთთან ურთიერთობის მოგვარება და კორუფციის აღმოფხვრა იყო. არსებობს კითხვები მის ბიზნესთან დაკავშირებით, რომლის გაყიდვის პირობაც მან წინასაარჩევნო კამპანიის დროს დადო.

უკრაინის საპრეზიდენტო არჩევნებში 39 კანდიდატი იღებდა მონაწილეობას. პირველი ტურის შედეგად 50 პროცენტზე მეტი ვერავინ აიღო. მეორე ტური 21 აპრილს გაიმართება.

გაიგეთ მეტი: რა უნდა ვიცოდეთ უკრაინის საპრეზიდენტო არჩევნებზე