დრონები ჩვენი თანამედროვე რეალობისთვის უკვე ჩვეულებრივ მოვლენად იქცა, მათი გამოყენება ბევრ სფეროში ხდება და საკმაოდ წარმატებულადაც. ის კი არა, დრონებით გადაღებული ფილმების ფესტივალიც კი არსებობს.

ამ მოწყობილობის გამოყენება უამრავ რამეში შეიძლება. მაგალითად, ჩემს წარმოდგენაში, კახელი ფერმერები ვენახს დრონების საშუალებით წამლავენ. მევენახეობის ეს თანამედროვე გზა, ძალიან მომწონს, რადგან ფუტურიზმისა და ოპტიმიზმის განცდას ერთად მიქმნის.

ვენახის შეწამვლა არა, მაგრამ საქართველოში კარგ ფოტოებს და ვიდეოებს იღებენ დრონებით. თუმცა უფრო ხშირად ქორწილებს და ხანდახან პოლიტიკურ რეკლამებსაც.

აი, იმ ქვეყნებში კი, სადაც სადარდებელი თითქოს არაფერი აქვთ, დრონები თითქმის ყველა სფეროში დანერგეს და აგერ ახალი სპორტის მოიგონეს.

როგორც ვიდეოში ჩანს, დრონით წყალზე სრიალი მშვენიერი გასართობია და ალბათ რამდენიმე წელიწადში ან სულაც მალე, რადგან თანამედროვე ტენდენციებს ასე თუ ისე ფეხს ვუწყობთ ხოლმე, ბათუმისა და ურეკის პლაჟზე ბანანს და სკუტერებს ჩაანაცვლებს.