სოციალურმა მუშაკებმა გაფიცვა შეწყვიტეს და სამუშაო ადგილებს უბრუნდებიან. როგორც გაფიცულმა სოც. მუშაკმა ქეთევან ხუციშვილმა On.ge-ს უთხრა, პირველი აპრილს კომიტეტის სხდომაზე პარლამენტმა პასუხისმგებლობა აიღო, რომ ჯანდაცვისა და ფინანსთა სამინისტროებთან ერთად განიხილავენ ბიუჯეტის საკითხს, რათა ყველა მოთხოვნა დაკმაყოფილდეს.

ხუციშვილის თქმით, შესაბამისი სხდომა ადამიანის უფლებათა დაცვის კომიტეტში 15 აპრილს შედგება და ამ ხნის განმავლობაში სოციალური მუშაკები ბენეფიციარებს ვერ მიატოვებდნენ.

"სამინისტრო კი აცხადებდა, რომ უწყვეტად ხდებოდა მომსახურების მიწოდება, რეალურად, ბენეფიციარები ძალიან დიდ გასაჭირში იყვნენ და მიტოვებულები იყვნენ. მათ ვერავინ ვერ ეხმარებოდა და ისევ გაფიცული სოციალური მუშაკები ეხმარებოდნენ. თუმცა გაფიცვის გამო ხელშეკრულება და მანდატი შეჩერებული ჰქონდათ და მხოლოდ ტელეფონით შემოიფარგლებოდნენ", — აღნიშნა ხუციშვილმა.

მისივე თქმით, სოციალური მუშაკები დამოუკიდებელ პროფესიულ კავშირს ქმნიან და აქტიური მოლაპარაკებების რეჟიმში გადადიან.

25 მარტს ქვეყნის მასშტაბით სოციალური მომსახურების სააგენტოში დასაქმებული ყველა სოციალური მუშაკი გაიფიცა. ისინი სამუშაო პირობების გაუმჯობესებასა და ბენეფიციარებისთვის ეფექტიანი და მყისიერი მომსახურებების შექმნას ითხოვენ. გაფიცვას წინ უძღვოდა თვენახევრიანი მედიაციის პროცესი, რომელიც უშედეგოდ დასრულდა.

გაფიცვის პერიოდში ისინი შეხვდნენ ჯანდაცვის მინისტრს და სამინისტროს წარმომადგენლებს. რაც შეეხება სერვისების მიწოდებას, სამინისტრო აცხადებდა, რომ გაფიცვის პერიოდში ბენეფიციარები სერვისებს სამინისტროს სხვა თანამშრომლები უწყვეტად აწვდიან.

დღეს, 2 აპრილს სოციალური მუშაკების მიერ გავრცელებულ განცხადებაში აღნიშნულია, რომ ამ ეტაპისთვის შეთანხმება მოხდა შემდეგ საკითხებზე

  • სოციალური მუშაკის სამუშაო განიტვირთა ტექნიკური საქმიანობისგან;
  • სოციალური მომსახურების ცენტრებში გამოიყო 12 მანქანა და მაისის ბოლომდე იგეგმება კიდევ 18 მანქანის დამატება. ხოლო მაისის ბოლომდე დასრულდება მოლაპარაკებები ტაქსის კომპანიებთან, რათა საჭიროების შემთხვევაში მოხდეს სოციალური მუშაკების ტრანსპორტირება;
  • 12 იურისტი დაემატება სოციალური მომსახურების ცენტრებს;
  • გამარტივდა ექსპერტიზის ბიუროსთან ხელმოწერის პროცედურა;
  • დაემატა 1 ფსიქოლოგი თბილისში;
  • დაიგეგმა ინფრასტრუქტურისა და სამუშაო პირობების გაუმჯობესების მიზნით ტენდერის გამოცხადება.

ამავე დროს, სოციალური მუშაკები ამბობენ, რომ შეთანხმებას ვერ მიაღწიეს შემდეგ საკითხებზე:

  • მეურვეობისა და მზრუნველობის სისტემაში არსებულ გამოწვევებზე რეაგირების საბჭოს შექმნა, რომელშიც უნდა შევიდნენ როგორც პრაქტიკოსი სოციალური მუშაკები, ასევე დარგის ექსპერტები და არასამთავრობო ორგანიზაციები;
  • არ განხილულა სოციალური მუშაკების ხელფასის განაკვეთის ზრდა;
  • საპროცესო წარმომადგენლობასთან დაკავშირებით დაიგეგმა სხვა უწყებებთან მოლაპარაკებების წარმოება, ასევე, უწყების შიგნით საკითხზე მუშაობა, თუმცა, ჯერჯერობით საკითხი რჩება ღიად.

ამავე თემაზე: