ხვალ, 25 მარტს, დილის 08:30 საათიდან ქვეყნის მასშტაბით სოციალური მომსახურების სააგენტოში დასაქმებული ყველა სოციალური მუშაკი გაიფიცება. ისინი სამუშაო პირობების გაუმჯობესებასა და ბენეფიციარებისთვის ეფექტიანი და მყისიერი მომსახურებების შექმნას ითხოვენ.

საპროტესტო აქციები ოთხ ქალაქში გაიმართება. კერძოდ, თბილისში გაფიცვა 08:30 საათზე დაიწყება ინგოროყვას ქუჩაზე, ბათუმში 10 საათზე ნინოშვილის ქუჩაზე, ქუთაისში 10 საათზე ჩეჩელაშვილის ქუჩაზე, თელავში კი 11 საათზე ელიოზიშვილის ქუჩაზე. გარდა ამისა, 19 საათზე თბილისში სოც. მუშაკების მხარდამჭერი აქციაა დაგეგმილი.

ადამიანის უფლებების სწავლებისა და მონიტორინგის ცენტრში (EMC) აცხადებენ, რომ სოციალურ მუშაკებზე დამსაქმებლები ზეწოლას ახდენენ და გაფიცვის შემთხვევაში სამსახურიდან გაშვებით და სხვადასხვა სახის უარყოფითი შედეგებით ემუქრებიან. ისინი მოუწოდებენ შინაგან საქმეთა სამინისტროს დაუყოვნებლივ შეისწავლონ სოც. მუშაკებზე შესაძლო ზეწოლის შემთხვევები.

"მნიშვნელოვანია, სოციალურმა მუშაკებმა გაფიცვის უფლების რეალიზაცია სრულყოფილად შეძლონ, იმის მიუხედავად, თუ ამ აქტს რა გავლენა შეიძლება ჰქონდეს სხვა ჯგუფების მდგომარეობაზე. სოციალური მუშაკების უფლებების ეფექტიანი დაცვა, გრძელვადიან პერსპექტივაში, სწორედ სხვადასხვა დაუცველი ჯგუფების ინტერესებზე აისახება დადებითად", — აცხადებენ ორგანიზაციაში.

სოც. მუშაკებმა გაფიცვის შესახებ ჯანდაცვის სამინისტროს 21 მარტს აცნობეს, რასაც წინ თვენახევრიანი უშედეგო მედიაცია უძღოდა. მედიაციის პროცესი სოციალურ მუშაკებსა და სამინისტროს შორის თებერვალში დაიწყო. მეურვეობისა და მზრუნველობის სისტემის ძირეული რეფორმის მოთხოვნით სოციალურმა მუშაკებმა პეტიცია შექმნეს. პეტიციით ისინი ჯანდაცვის სამინისტროს, პარლამენტსა და მთავრობას მიმართავენ.

სოციალური მუშაკები ამბობენ, რომ წლების წინ ბავშვთა ზრუნვის სისტემის წარმატებით დაწყებული რეფორმა ვეღარ ფუნქციონირებს და ბავშვთა საუკეთესო ინტერესებს მორგებული არაა.

ამავე თემაზე: სოციალური მუშაკი — პროფესია, რომლის მნიშვნელობასაც სისტემა ვერ ხვდება