დიდი ბრიტანეთის პარლამენტმა ბრექსიტის არც ერთ ვარიანტს მხარი არ დაუჭირა. 27 მარტის კენჭისყრაზე დეპუტატებმა განსახილველად გამოტანილი რვა ვარიანტი უარყვეს. თემთა პალატაში 639 დეპუტატია და მათ უფლება ჰქონდათ ერთდროულად რამდენიმე ვარიანტისთვის დაეჭირათ მხარი.

დეპუტატების მიერ დაყენებული რვა ვარიანტი მოიცავდა როგორც ევროკავშირიდან მომენტალურ გამოსვლას, ისე უშუალოდ ბრექსიტის გაუქმებას:

  • 12 აპრილს ევროკავშირის შეთანხმების გარეშე დატოვება;
  • თუ 12 აპრილამდე შეთანხმება მიღწეული არ იქნება, ევროკავშირიდან გამოსვლაზე უარის თქმა;
  • ევროკავშირიდან გამოსვლის ნებისმიერი შეთანხმების რეფერენდუმი;
  • ევროკავშირიდან გამოსვლა და 27 წევრ ქვეყანასთან საბაჟო კავშირში დარჩენა;
  • ორი ვარიანტი, რომელიც ევროკავშირიდან გამოსვლას და ევროპის ეკონომიკურ ზონაში დარჩენას და თავისუფალი ვაჭრობის ევროპულ ასოციაციაში გაწევრიანებას ეხება;
  • შეთანხმების შეცვლისთვის მოლაპარაკებების გაგრძელება;
  • ევროკავშირთან ორწლიანი შეთანხმების დადება, რა დროსაც ბრიტანეთის საქონელს ევროკავშირის ბაზარზე სრული ხელმისაწვდომობა ექნებოდა.

დეპუტატები ბრექსიტზე მოლაპარაკებებს ორშაბათს გააგრძელებენ და შედარებით მხარდაჭერილ ვარიანტებს განიხილავენ.

დიდ ბრიტანეთს ევროკავშირი 29 მარტს უნდა დაეტოვებინა, თუმცა არც მთავრობა და არც პარლამენტი ბრექსიტის პირობებზე შეთანხმებული არაა. ამავე დროს, ევროკავშირმა ბრიტანეთს ვადა 12 აპრილამდე მისცა, რათა ამ ხნის განმავლობაში გაერკვეს რომელი ვარიანტი აწყობს. თუ ამ ხნის განმავლობაში თემთა პალატა ვერ ჩამოყალიბდება, მაშინ 12 აპრილს დიდ ბრიტანეთს ევროკავშირის დატოვება შეთანხმების გარეშე მოუწევს.

პარლამენტმა პრემიერ-მინისტრ ტერეზა მეის მთავრობას ინიციატივის გამოხატვის უფლება უკვე ჩამოართვა და გადაწყვიტა, რომ გამოსავალი თვითონ მოეძებნა. 27 მარტის კენჭისყრამდე კი მეი დეპუტატებს დაპირდა, რომ გადადგება, თუ ბრექსიტის მის შეთანხმებას დაუჭერენ მხარს, რომელიც აქამდე მათ ორჯერ ჩააგდეს.

თუ მეის გეგმას მხარს დაუჭერენ ბრიტანეთი ევროკავშირიდან 22 მაისს გავა და ორწლიანი გარდამავალი პერიოდი დაიწყება. თუმცა აქაც არსებობს დაბრკოლება, რადგან თემთა პალატის სპიკერმა მთავრობას კენჭისყრაზე ორჯერ ჩაგდებული გეგმის გატანა აუკრძალა.