ბოლო დროს განვითარებულმა მოვლენებმა, ანაკლიის ღრმაწყლოვანი პორტის მშენებლობასთან დაკავშირებით საზოგადოებაში უამრავი ლეგიტიმური კითხვა გააჩინა. პოლიტიკოსების სხვადასხვა განცხადებებმა ანაკლიის პორტის მშენებლობის მიმართ უსაფუძვლო ეჭვები გამოიწვია.

ლოგიკურია, რომ ადამიანებს აინტერესებთ, რამდენად დროულად და გეგმის მიხედვით მიმდინარეობს პორტის მშენებლობა — ანაკლიის განვითარების კონსორციუმმა ამ და სხვა კითხვაზე ამომწურავი პასუხის მისაღებად 1-წუთიანი ვიდეო გაავრცელა. ვიდეოში აღწერილია, რა სამუშაოები ჩატარდა ამ დროის განმავლობაში და როდის შეძლებს პორტი პირველი გემის მიღებას.

ანაკლიის განვითარების კონსორციუმმა სამშენებლო ნებართვა 2017 წლის ნოემბერში მიიღო, ხოლო ამავე წლის დეკემბერში სამშენებლო სამუშაოები დაიწყო. მომდევნო წლის აგვისტოდან, ამ სფეროში მსოფლიოს ლიდერმა კომპანიამ, ვან ოორდმა, საზღვაო სამუშაოების განხორციელებას მიჰყო ხელი.

საზღვაო სამუშაოების დაწყებიდან 2 თვეში 5 მილიონი კუბური მეტრი ქვიშა ამოიტუმბა, რაც 500 ათასი სატვირთო მანქანის ტოლფასია. ამოტუმბული ქვიშა პორტის საძირკვლის შესაქმნელად, 110 ჰექტარ ტერიტორიაზე განთავსდა, რაც მასშტაბით 220 საფეხბურთო მოედანს უდრის, სიმაღლით კი სამ სართულიან შენობას. სამშენებლო ტერიტორიაზე 3500 კილომეტრის სიგრძის სადრენაჟო მილები დამონტაჟდა. ეს იგივეა, რაც საჰაერო მანძილი თბილისიდან ოსლომდე. დღეისთვის პროექტში სულ 70 მილიონი დოლარია ინვესტირებული და სამუშაობი მიჰყვება შეთანხმებულ გრაფიკს.

ვიდეოში ნათქვამია, რომ 2020 წლის ბოლოს ანაკლიის პორტი პირველ გემს მიიღებს.