საქსტატის წინასწარი მონაცემებით, 2018 წლის მე-4 კვარტალში პირდაპირი უცხოური ინვესტიციები 62 პროცენტით შემცირდა. 2017 წელს ეს რიცხვი 522,2 მილიონი დოლარი იყო, 2018-ში კი, 197,1 მილიონ დოლარამდე შემცირდა.

ფოტო: საქსტატი

რაც შეეხება წლიურ მაჩვენებელს, საქართველოში განხორციელებული პირდაპირი უცხოური ინვესტიციების მოცულობამ 2018 წელს 1 232,4 მლნ. აშშ დოლარი შეადგინა, რაც 34,9 პროცენტით ნაკლებია 2017 წლის შესაბამის მაჩვენებელზე (1 894,5). ბოლო 8 წლის განმავლობაში ეს მაჩვენებელი ყველაზე დაბალია.

საქსტატში განმარტავენ, რომ შემცირება რამდენიმე ძირითადი მიზეზის გამო მოხდა, მათ შორის მაგისტრალური გაზსადენის მშენებლობის პროექტის დასრულება, საქართველოს რეზიდენტების საკუთრებაში რამდენიმე საწარმოს გადასვლა, ასევე, არარეზიდენტი პირდაპირი ინვესტორის მიმართ ვალდებულებების შემცირება (სასესხო დავალიანების დაფარვა).