სახელმწიფო აუდიტის ანგარიშში ვკითხულობთ, რომ 2016-2017 წლებში ქუთაისში სოციალური საცხოვრისი უხარისხოდ არის აშენებული და საცხოვრებელ ფუნქციებს ვერ ასრულებს. მათივე თქმით, კონკურსის პირობები ერთ კომპანიაზე იყო მორგებული, ხოლო მერიამ საცხოვრისი არასაბაზრო ფასად შეისყიდა.

როგორც მცხოვრებლები რუსთავი 2-თან ყვებიან, კედლები თაბაშირ-მუშაოთია აშენებული და ფანჯრები იმ სიმაღლეზეა გაკეთებული, რომ მათი გამოყენება შეუძლებელი ხდება.

ირანდა ნემსიწვერიძე ამბობს, რომ საცხოვრისში ახალი შემოსული იყო, როდესაც სააბაზანოში ჭერი ჩამოვარდა. კიდევ ერთი მაცხოვრებელი მარინა სვანიძე ტელეკომპანიასთან ამბობს, რომ გაზქურები ბინებში დახვდათ, თუმცა შენობაში გაზი გაყვანილი არაა. მისივე თქმით, ბუნებრივი აირის შეყვანა გამწოვების არარსებობის გამო ვერ ხერხდება.

ერთ კომპანიაზე მორგებული კონკურსი

ქუთაისის საკრებულომ 2016-2017 წლებში საცხოვრისის მშენებლობისთვის. საკონკურსო პირობების თანახმად საცხოვრებელი ფართი 2 500მ² არანაკლები უნდა ყოფილიყო, ამასთანავე ეზოს ფართობი უნდა ყოფილიყო მინიმუმ 1 000მ^2, ხოლო აივნები არანაკლებს საცხოვრებელი ფართის 15 პროცენტის. თუმცა დასრულებულ შენობას აივნები არ აქვს.

აუდიტის დასკვნაში ვკითხულობთ, მერიამ კონკურსის პროცესი წარმართა და საკონკურსო მოთხოვნები განსაზღვრა ისე, რომ მასში მონაწილეობა მიეღო მხოლოდ ერთ დაინტერესებულ პირს — შპს სანოს.

2016 წელს შპს სანომ ნიკეას ქუჩაზე მდებარე შენობის რეკონსტრუქციის პროექტი და მასზე გაცემული სამშენებლო ნებართვა წარადგინა. აუდიტის სამსახური ამბობს, რომ კონკურსზე კომპანიამ წარადგინა არა ის პროექტი, რომელზეც ჰქონდა მშენებლობის ნებართვა, არამედ სხვა პროექტი და კონკურსზე წარდგენილ პროექტზე მშენებლობის ნებართვა არ ჰქონდა.

გარდა ამისა, დასკვნაში ვკითხულობთ, რომ სანო ახალი დარეგისტრირებული ფირმა იყო და ქუთაისში უძრავი ქონება არ ჰქონდა, ხოლო ნიკეას ქუჩაზე მდებარე შენობა კონკურსის გამოცხადებამდე ერთი დღით ადრე 300 ათას დოლარად შეიძინა.

მათივე თქმით, კონკურსზე ფირმის მიერ წარდგენილი პროექტი არ შეესაბამებოდა კონკურსის პირობებს და პროექტს არ ჰქონდა აივნები, ფანჯრები არ იყო საცხოვრებელი სახლისთვის შესაფერისი და სხვა.

უხარისხოდ შესრულებული სამუშაოები

აუდიტის სამსახურმა სოციალური საცხოვრისი 2018 წლის იანვარში დაათვალიერა. მათივე თქმით, შენობა, ვერ აკმაყოფილებს საცხოვრებლის ფუნქციებს, სადაც შესაძლებელია, რომ ოჯახმა იცხოვროს.

"სამუშაოები შესრულებულია უხარისხოდ, შენობას არ აქვს აივნები, ფანჯრები დამონტაჟებულია ისეთ სიმაღლეზე, რომ მანძილი ფანჯრის სახელურიდან იატაკამდე დაახლოებით 2 მეტრია, რაც ართულებს მოსახლეობის მხრიდან მათ გამოყენებას. გარდა ამისა, სამზარეულო და საძინებელი ოთახები არ არის ერთმანეთისგან გამიჯნული და სხვა", — ვკითხულობთ ანგარიშში.

ასევე, დოკუმენტში აღნიშნულია, რომ შენობაში განხორციელებული რემონტი დაზიანებულია და საცხოვრებლად არ არის შექმნილი სათანადო პირობები.

ხელშეკრულების თანახმად მერიამ 2 500მ² სანოსგან 2,5 მილიონ ლარად შეიძინა, თუმცა რამდენიმე თვეში მერიამ კომპანიისგან დამატებით ამავე შენობაში არსებული 1,872 მ² 1,8 მილიონად შეისყიდა. ანგარიშში აღნიშნულია, რომ დამატებითი ფართის შესყიდვას კონკურსის პირობები და მოთხოვნები არ ითვალისწინებდა.

ანგარიშში აღნიშნულია, რომ მერიას რეკონსტრუქციის პროცესზე რაიმე სახის კონტროლი არ შეუსრულებია და მუნიციპალიტეტმა პროექტის შესაბამისობის დოკუმენტი ვერ წარადგინა .

დასკვნის მიხედვით, სოციალური საცხოვრისის შენობის 1მ² ფართის საბაზრო ღირებულება 540 ლარია, ხოლო ფაქტიური აზომვით დადგინდა, რომ გადაცემული ფართი 4 288,4 მ²-ია. შესაბამისად, შენობის სრული ღირებულება 2,3 მლნ ლარია. მერიამ კი ხელშეკრულებების მიხედვით ჩაიბარა 4ბ 372მ² ფართი ღირებულებით 4,3 მლნ ლარად.

"სხვაობა მერიის მიერ დოკუმენტურად ჩაბარებულ ფართსა და ფაქტიურად შესრულებულ სამუშაოს შორის შეადგენს 83მ², ხოლო სხვაობა ჩაბარებული შენობის ღირებულებასა და ექსპერტიზის დასკვნით დადგენილ ღირებულებას შორის შეადგენს 2 მლნ ლარს", — ნათქვამია აუდიტის დასკვნაში.