საქართველოს შინაგან საქმეთა მინისტრმა გიორგი მღებრიშვილმა ტელეკომპანია იმედის ეთერში, გადაცემაში იმედის დრო, განაცხადა, რომ ქვეყანაში კრიმინალი გაზრდილი არ არის და სტატისტიკა საპირისპიროზე მეტყველებს:

"თუ მაინცდამაინც სტატისტიკაზე ვსაუბრობთ, თუ გადავხედავთ სტატისტიკას, მე არ მაძლევს ეს ციფრები იმის თქმის საშუალებას, რომ კრიმინალი გაზრდილია. პირიქით, მე მინდა გითხრათ, რომ საგრძნობლად არის მძიმე დანაშაულებების რაოდენობა დაკლებული ჩვენს ქვეყანაში".

მღებრიშვილმა უსაფუძვლო უწოდა ოპოზიციის ბრალდებებს კრიმინალის ზრდასთან დაკავშირებით და განაცხადა, რომ მოსახლეობის აღქმა გაზრდილ კრიმინალთან დაკავშირებით, დამთხვევებს უკავშირდება:

"ბოლო კვირის განმავლობაში მართლაც ორი გახმაურებული მკვლელობა დაემთხვა ერთმანეთს, რამაც შესაძლოა არასწორი შთაბეჭდილება გაუჩინა მოსახლეობას გაზრდილ კრიმინალთან დაკავშირებით, მაგრამ მე სრული პასუხისმგებლობით ვაცხადებ, მსგავსი არაფერი არ არის, ანუ ამ მიმართულებით ჩვენ საგანგაშო არაფერი არ გვაქვს. დანაშაული ზოგადად, ყოველთვის ხდებოდა, ხდება და მომავალშიც მოხდება. დანაშაული ხდება ისეთ ქვეყნებში, როგორიცაა აშშ, ევროპის ქვეყნები, აზიის ქვეყნები, რომელი ერთი ჩამოგითვალოთ? მაგრამ მთავარია რას ვუპირისპირებთ ჩვენ მას".

შინაგან საქმეთა მინისტრმა კრიმინალის კლების დასტურად გაიხსენა ავსტრიის, ბელგიისა და ევროპის სხვა ქვეყნების მიერ საქართველოს უსაფრთხო ქვეყნების სიაში შეყვანის ფაქტი. მისი თქმით, ამის საფუძველი კრიმინალის დაბალი დონე და მაღალი სტანდარტი გახდა.

მღებრიშვილმა ასევე დააანონსა რამდენიმე დღეში მაღალტექნოლოგიური ვიდეომეთვალყურეობის ცენტრის გახსნა. მინისტრის თქმით, შსს პროექტზე უკვე 6 თვეა მუშაობს და ეს სისტემა დაეხმარება პოლიციას დანაშაულის პრევენციაში:

"ეს არის არის რევოლუციური პროექტი. ეს არის ვიდეომეთვალყურეობის სისტემის განვითარება ქვეყნის მასშტაბით, რომელიც აღჭურვილია ანალიტიკური პროგრამებით და უმსუბუქებს ტვირთს პოლიციას. თვის ბოლოს მოგიწვევთ ჟურნალისტებს პრეზენტაციაზე".