ქართული ოცნების ყოფილი დეპუტატი, ზვიად კვაჭანტირაძე ამბობს, რომ პარტიის საერთო ჩატში სხვადასხვა საკითხთან დაკავშირებით მოდიოდა მესიჯები, რომელთა ავტორიც მან დღემდე არ იცის. მისივე თქმით, მსგავსი პრაქტიკა პარლამენტში 2016 წლის შემდეგ დამკვიდრდა.

"ძალიან ბევრი ჩვენი კოლეგა იმაზე ჩიოდა, რომ პრაქტიკულად, ჩვენ ერთმანეთს არ ვესაუბრებით ლაივში. ფრაქციის სხდომა, საერთოდ არ მახსოვს, როდის ჩატარდა. უმრავლესობის სხდომები ტარდებოდა ხოლმე, როცა უკიდურესი აუცილებლობა ხდებოდა. სხვა მხრივ, ძირითადად, მესიჯები მოდიოდა და დღემდე არ ვიცი, ვინ წერს ამ მესიჯებს", — ყვება ზვიად კვაჭანტირაძე გადაცემა პირველებში.

როგორც კვაჭანტირაძე ამბობს, ჩატს კონკრეტული, არა ფიზიკური პირის სახელი ჰქვია. დეპუტატის თქმით, ეკა ბესელიას კანონპროექტთან დაკავშირებითაც მოვიდა მესიჯი, თუმცა ის არ იყო ირაკლი კობახიძის.

მას არ ახსოვს მიიღეს თუ არა მესიჯი ირმა ინაშვილის რეზოლუციასთან დაკავშირებით, თუმცა "ხმა გავრცელებული იყო", რომ მხარი არ უნდა დაეჭირათ.

კვაჭანტირაძემ ქართული ოცნების პარტია და ფრაქცია 27 თებერვალს დატოვა. მანამდე მოსამართლეების საკითხის გამო ქართული ოცნება დატოვეს ეკა ბესელიამ, გედევან ფოფხაძემ და ლევან გოგიჩაიშვილმა.

მმართველი პარტია დატოვა ბექა ნაცვლიშვილმაც, მაგრამ განსხვავებული მიზეზით.მან ამ ფორმით გააპროტესტა ის, რომ პარლამენტმა დაგროვებით პენსიაზე მის კანონპროექტს მხარი არ დაუჭირა. დეპუტატ გია ჟორჟოლიანის თქმით, უმრავლესობა შესაძლოა, სოციალ-დემოკრატებმაც დატოვონ.

მმართველი პარტიიდან დეპუტატების წასვლის შემდეგ ქართულმა ოცნებამ საკონსტიტუციო უმრავლესობა დაკარგა.

ამავე თემაზე: