საქართველოს პარლამენტში მეორე დღეა განიხილავენ იმ კრიტერიუმებს, რომლის მიხედვითაც უზენაესი სასამართლოს მოსამართლეობის კანდიდატების შერჩევა და პარლამენტში წარდგენა უნდა მოხდეს. სამუშაო ჯგუფის მუშაობაში მონაწილეობას უმრავლესობის წევრები, არასამთავრობო სექტორის ნაწილი, დიპლომატიური კორპუსი და იუსტიციის საბჭოს მოსამართლე და არამოსამართლე წევრები იღებენ.

იუსტიციის საბჭოს არამოსამართლე წევრის ანა დოლიძის განმარტებით, შეხვედრაზე განიხილება საქართველოს პარლამენტის თავმჯდომარის მიერ შემუშავებული კანონპროექტი, რომელიც, მისი თქმით, იუსტიციის უმაღლესი საბჭოს ინტერესებს ემსახურება.

ანა დოლიძე, იუსტიციის უმაღლესი საბჭოს არამოსამართლე წევრი

ანა დოლიძე, იუსტიციის უმაღლესი საბჭოს არამოსამართლე წევრი

ფოტო: პრეზიდენტის ადმინისტრაცია

ანა დოლიძის ცნობით, საპარლამენტო უმრავლესობის მიერ შემუშავებულ კანონპროექტში წერია, რომ უზენაესი სასამართლოს მოსამართლეობის კანდიდატი შეიძლება იყოს პირი, რომელიც არის მოქმედი ან ყოფილი მოსამართლე და აქვს ჩაბარებული მოსამართლეთა საკვალიფიკაციო გამოცდა. პროექტის მიხედვით, კონკურსანტებს აარჩევს იუსტიციის უმაღლესი საბჭო წევრების 2/3-ის თანხმობით, ანუ 15-დან 10 ხმით. ხმის მიცემის დროს ფარული კენჭისყრაა გათვალისწინებული და თუ ორი კანდიდატი ერთნაირ ხმებს მიიღეს, იმას ირჩევენ, რომელსაც მეტი გამოცდილება ექნება.

"ორი ამოსავალი პრინციპი, რომელიც ჩვენ გვაქვს და რომელიც სიახლისთვის და პროგრესისთვის აუცილებელია ეს არის, რომ ამ კლანმა არ დანიშნოს ხალხი, ანუ პროცესი იყოს გამჭვირვალე და საბჭოს უმცირესობასაც ჰქონდეს შესაძლებლობა ხმის ძალაუფლების განხორციელების. მეორე, რაც შეიძლება მეტი ხალხი შევიდეს სასამართლოს გარედან, კონკურსის წესით. ეს ორი პრინციპი კობახიძეს აქვს ჩაკეტილი იმიტომ, რომ ისევ 2/3-ით, 10 ხმით დანიშნავს კლანი უზენაეს სასამართლოში და შეუძლებელია, კონკურსში მოხვედრა, თუ არ ხარ ყოფილი მოსამართლე, მოქმედი მოსამართლე და არ გაქვს ჩაბარებული მოსამართლეთა საკვალიფიკაციო გამოცდა, რომელსაც ადგენენ და ასწორებენ მოსამართლეები. თავიდან ბოლომდე ეს პროექტი კობახიძემ დაუწერა მურუსიძეს", — განუცხადა On.ge-ს ანა დოლიძემ.

ფოტო: რადიო თავისუფლება

დამოუკიდებელი და გამჭვირვალე მართლმსაჯულების კოალიციის წევრი გიორგი მშვენიერაძე სამუშაო ჯგუფს მიმართავს, რომ თუ ისინი არ გაითვალისწინებენ კოალიციის 5-პუნქტიან შეთავაზებას პროცესში მონაწილეობას აღარ მიიღებენ და სამუშაო ჯგუფს დატოვებენ.

ეს ხუთი საკითხია:

  1. კონკურსში მონაწილეობა ღია უნდა იყოს და მასში არ უნდა მონაწილეობდნენ მარტო ის პირები, ვისაც მოსამართლის საკვალიფიკაციო გამოცდა აქვს ჩაბარებული. კონკურსში მონაწილეობის საშუალება უნდა მიეცეთ პროფესიონალ ადვოკატებსა და პროკურორებს;
  2. ინტერესთა კონფლიქტის საკითხი — საბჭოს იმ წევრებს, რომლებსაც სურთ კონკურსში მონაწილეობა არ უნდა ჰქონდეთ საშუალება პარალელურად საბჭოს წევრებიც იყვნენ;
  3. კანონპროექტიდან ფარდობითი კენჭისყრის ამოღება, რომელიც საფუძველი უნდა გახდეს ე.წ. გრძელი სიის შექმნის, რადგან ეს საშუალებას აძლევს კლანს სასამართლოში პირველივე ეტაპზე გამორიცხოს ყველა ის კანდიდატი, რომელსაც ექნება დანარჩენი სამი წევრის მხარდაჭერა;
  4. საბჭომ კენჭისყრის დროს გადაწყვეტილება 2/3-2/3-ით უნდა მიიღოს, კერძოდ, კანდიდატს მხარი უნდა დაუჭიროს მოსამართლე წევრების 2/3-მა და არამოსამართლე წევრების 2/3-მა;
  5. როცა პარლამენტში სია გადმოიგზავნება, უნდა შეიქმნას სამუშაო ჯგუფი, რომელიც შეამოწმებს ამ კანდიდატების ბექგრაუნდს და მოამზადებს საკომიტეტო განხილვისთვის.

იუსტიციის საბჭოს მოსამართლე წევრი, ლევან მურუსიძე აკრიტიკებს არასამთავრობო სექტორს და ამბობს, რომ საკვალიფიკაციო გამოცდების საკონკურსო პირობებიდან ამოღებას არასამთავრობოები იმიტომ ითხოვენ, რომ გამოცდებს ვერ აბარებენ.

ლევან მურუსიძე

"არასამთავრობოების მოთხოვნა არის, რომ იუსტიციის საბჭოს მოსამართლე წევრებს შეეზღუდოთ უფლება, წარადგინონ კანდიდატები იმიტომ, რომ ჩვენ ვართ კლანი, უბედურება, ბნელი ხალხი.

14 წევრი არის საბჭოში და მათ უნდათ, რომ 14-მ მიიღოს ერთდროულად გადაწყვეტილება, ეს ხომ აბსურდია. არსად მთელ მსოფლიოში არ არსებობს ასეთი ქვეყანა, სადაც ერთპიროვნულად იღებდნენ გადაწყვეტილებას კოლეგიალურ ორგანოში", — განუცხადა On.ge-ს ლევან მურუსიძემ.

მისი თქმით, ისე გამოდის, რომ საქართველოში დადის ძალიან ბევრი ღირსეული კანდიდატი და დიტო გვრიტიშვილი და დიმიტრი მიქაუტაძე უკეტავენ კარს.

"გამოცდებს ვერ აბარებენ ამ დროს. როცა საუბრობენ, რომ იუსტიციის საბჭო არის დახურული სისტემა, რაც მე საბჭოს მდივანი ვიყავი ერთი არასამთავრობოს წარმომადგენელი არ გამოსულა კონკურსზე. გამოვიდეს ეკა გიგაური, გიორგი მშვენიერაძე, კახა კოჟორიძე და აჩვენონ ის მაღალი სტანდარტი, რომელიც უზენაესი სასამართლოს კანდიდატს შეეფერება. გამოცდა ჩააბარონ. კლანებზე საუბრობენ და გამოცდის ჩაბარება არ უნდათ, აი ესაა სიმართლე", — აცხადებს მურუსიძე.

ფოტო: გვანცა ნემსაძე / On.ge

იუსტიციის საბჭოს მოსამართლე წევრის, დიმიტრი გვრიტიშვილის თქმით, მოსამართლეთა საკვალიფიკაციო გამოცდების მოთხოვნებიდან ამოღება არათანაბარ პირობებში აყენებს იმ მოსამართლეებს, რომლებიც დაინიშნენ სისტემაში და მათთვის გამოცდების ჩაბარება სავალდებულო იყო.

"უსამართლობაა იმაზე ნაკლებად მკაცრი კრიტერიუმების გაწერა უმაღლესი ინსტანციის სასამართლოსთვის, ვიდრე არის პირველ და მეორე ინსტანციის მოსამართლეებისთვის", — აცხადებს დიმიტრი გვრიტიშვილი.

ის ამბობს, რომ უზენაესი სასამართლო და მოსამართლეები ავტორიტეტები უნდა იყვნენ ქვედა ინსტანციებისთვის და უფრო მარტივი კრიტერიუმების დაწესება არარელევანტურია.