საჩხერე-ჭიათურის მიტროპოლიტი დანიელი ამბობს, რომ საქართველოს მეოთხე პრეზიდენტი, გიორგი მარგველაშვილი დეკანოზ გიორგი მამალაძის შეწყალებას აპირებდა, რაზეც საპატრიარქოც თანახმა იყო, თუმცა "ხელისუფლებამ თავი შეიკავა".

"ჩემი პოზიცია და ეკლესიის პოზიცია ასეთია, რომ როდესაც წინა პრეზიდენტი აპირებდა ამ შეწყალებას, ეკლესია მზად იყო და, რასაკვირველია, მიესალმებოდა და ახლაც იგივე პოზიციაზე დგას ეკლესია. თუ ეს მოხერხდება ეკლესია ამის წინააღმდეგი არ იქნება. პირიქით, ეკლესია არის ის, ვინც ამ შეწყალებაში მონაწილეობს. აპირებდა შეწყალებას და, მე როგორც ვიცი, ითხოვა და ხელისუფლებამ თავი შეიკავა", — აღნიშნა მიტროპოლიტმა ჟურნალისტებთან.

ექს-პრეზიდენტმა დეკანოზი რომ არ შეიწყალა, 27 სექტემბერს გახდა ცნობილი. შეწყალების კომისიის ყოფილი თავჯდომარე, ზვიად ქორიძე ხელისუფლების მხრიდან პრეზიდენტზე ან კომისიაზე რაიმე ზეწოლას გამორიცხავს.

როგორც ქორიძემ On.ge-ს უთხრა, კომისიამ მამალაძის საქმე განსაკუთრებული წესით განიხილა, რადგან მას სასჯელის ნახევარი მოხდილი არ ჰქონდა. განსაკუთრებული გარემოების გამო დადებითი რეკომენდაციისათვის კომისიის ყველა წევრის თანხმობა იყო საჭირო. მისივე თქმით, ინტერესთან კონფლიქტის გამო საქმეს განარიდეს ეპისკოპოსი თეოდორე.

"დადებითი რეკომენდაცია ვერ შევთავაზეთ პრეზიდენტს და მან გაიზიარა ჩვენი პოზიცია... ის, რომ მთავრობას ჰქონდა რაიმე ზეწოლა ან პრეზიდენტზე ან კომისიაზე, ამას პრინციპულად გამოვრიცხავ... ცოტა მიკვირს რატომ წამოვიდა დღეს ეს თემა მიტროპოლიტისგან, თან ასე გადამოუწმომებელი, არაკორექტული ფორმით, ვერ ვხვდები", — თქვა ზვიად ქორიძემ.