პრეზიდენტმა, გიორგი მარგველაშვილმა დეკანოზი გიორგი მამალაძე არ შეიწყალა. ამის შესახებ დღეს, 27 სექტემბერს გამართულ ბრიფინგზე, შეწყალების საკითხთა კომისიის თავმჯდომარემ, ზვიად ქორიძემ განაცხადა.

ქორიძის განმარტებით, საქმეს კომისია განიხილავდა განსკუთრებული წესით, რადგან გიორგი მამალაძეს არ აქვს მოხდილი სასჯელის ნახევარი. ამ წესის თანახმა, სხდომას უნდა ესწრებოდეს სრული შემაგდენლობის არანაკლებ სამი მეოთხედი და დადებითი რეკომენდაცია უნდა მიიღოს სრულმა შემადგენლობა, ანუ ყველამ, ვინც ესწრება სხდომას.

"გიორგი მამალაძის საქმის განხილვისას კომისიის წევრთან სრული კონსენსუსი არ შედგა, შესაბამისად, პრეზიდენტს დადებითი რეკომენდაცია ვერ მისცა. პრეზიდენტმა კომისიის პოზიცია გაიზიარა", — განაცხადა ქორიძემ.

ზვიად ქორიძემ, ასევე, აღნიშნა, რომ კომისიას არ განუხილავს ვანო მერაბიშვილის შეწყალების საკითხი, რადგან მას კომისიისთვის განცხადებით არ მიუმართავს.

საქართველოს პრეზიდენტმა 866 პირის საქმე განიხილა. სულ პრეზიდენტმა 111 მსჯავრდებული შეიწყალა, მათგან 42 დღესვე დატოვებს საპატიმრო დაწესებულებას. მათ შორის, არის სამი ქალი და ერთი არასრულწლოვანი მსჯვარდებულია. დანარჩენებს კი სხვადასხვა ოდენობით შეუმცირდათ საპატიმრო სასჯელი, მათ შორის, ოთხ ქალსა და ექვს არასრულწლოვანს.