"საკანონმდებლო ცვლილებების მიუხედავად, არ შესრულებულა იუსტიციის საბჭოსთან დაკავშირებული აქტივობები", — საქართველო-ევროკავშირის 2017-2020 წლების ასოცირების დღის წესრიგის ანგარიშში ნათქვამია, რომ მართლმსაჯულების სექტორში ამოცანები ნაწილობრივ შესრულდა. დოკუმენტი ფონდი ღია საზოგადოება — საქართველოს მხარდაჭერით მომზადდა.

ანგარიში ყურადღებას ამახვილებს სასამართლო სისტემაში განხორციელებულ რეფორმებზე, და საუბარია მართლმსაჯულების სფეროს ხარვეზებზე. დოკუმენტში აღნიშნულია, რომ მოსამართლეთა შერჩევა/დანიშვნის წესი კვლავ არ აკმაყოფილებს ობიექტურ კრიტერიუმებზე დაფუძნებულ სტანდარტს:

"პროცესი არ არის დასაბუთებული და გამჭვირვალე. არ მომზადებულა საკანონმდებლო ცვლილებების პროექტი იუსტიციის უმაღლესი საბჭოს საქმიანობის წესის შესახებ. იუსტიციის უმაღლესი საბჭოს საქმიანობასთან დაკავშირებული მნიშვნელოვანი საკითხები ჯერ კიდევ არ რეგულირდება კანონით, რაც ამცირებს საბჭოს საქმიანობის შესახებ ანგარიშვალდებულებას. მათ შორის, არ გაუმჯობესებულა იუსტიციის უმაღლესი საბჭოს საქმიანობის, გადაწყვეტილებების მიღების, დასაბუთებისა და გამოქვეყნების პროცედურები".

ანგარიშში საუბარია ასევე სახელმწიფო ინსპექტორის აპარატის ეფექტიანობაზე, რომლის შესახებ საქართველოს პარლამენტმა კანონი 2018 წლის 20 ივლისს მიიღო:

"ინსტიტუტის მიზანია სამართალდამცავი ორგანოს წარმომადგენლის ან მოხელის მიერ ჩადენილ დანაშაულის გამოძიება დამოუკიდებელი და მიუკერძოებელი ინსტიტუტის მიერ. პარლამენტმა კანონის ამოქმედებამდე რამდენიმე დღით ადრე, მასში ცვლილებები შეიტანა, რაც უარყოფითად უნდა შეფასდეს, რადგან ამან ხელი შეუწყო კანონის ძალაში შესვლას ექვსი თვის დაგვიანებით".

ანგარიშში ასევე წერია, რომ პარლამენტის მიერ მიღებული ორგანული კანონი საქართველოს პროკურატურის შესახებ მხოლოდ ფორმალურ შესაბამისობაშია კონსტიტუციის ახალ რედაქციასთან:

"ეს თავისთავად არ არის საკმარისი პროკურატურის სრულფასოვანი რეფორმის განსახორციელებლად. საპროკურორო საბჭოს არა აქვს საკმარისი გარანტიები ფუნქციური და ინსტიტუციური დამოუკიდებლობის მისაღწევად".

ანგარიშში ნათქვამია, რომ მართლმსაჯულების სექტორში 2017 წლის 29 მაისს დამტკიცდა სასამართლო სისტემის სტრატეგია 2017-2021 წლებისათვის და 2017-2018 წლების სამოქმედო გეგმა.

ასევე დადებითადაა შეფასბეული ისიც, რომ იუსტიციის უმაღლესმა საბჭომ მიიღო საკვალიფიკაციო გამოცდის და მისი მოსამზადებელი პროცესის განახლებული წესი.