ეროვნულ-დემოკრატიული ინსტიტუტის (NDI) კვლევის მიხედვით, გამოკითხულთა უმრავლესობა (56%) ფიქრობს, რომ არჩევნების პროცესის დროს საჯარო მოხელეების მობილიზებას კამპანიაში მონაწილეობის მიღებისა და კანდიდატისთვის ხმის მიცემის მიზნით, ადგილი არ ჰქონია.

ამავე კლევის მიხედვით, გამოკითხულთა 62 პროცენტი ამბობს, რომ ამომრჩეველი არ მოუსყიდიათ, ხოლო 59 პროცენტის აზრით, ადმინისტრაციული რესურსი არჩევნების დროს ხელისუფლებას არ გამოუყენებია.

კვლევაში ასევე ნათქვამია, რომ მოსახლეობის 72 პროცენტის აზრით, ამომრჩეველთა ან პარტიის წარმომადგენელთა შევიწროვებას ადგილია არ ჰქონია. მოსახლეობის 68 პროცენტის აზრით, ხმის მიცემა განმეორებით ანუ ე.წ. კარუსელი არ დაფიქსირებულა.

ეროვნულ-დემოკრატიული ინსტიტუტის (NDI) სადამკვირვებლო დელეგაციამ საპრეზიდენტო არჩევნების შეფასებისას განაცხადა, რომ არჩევნების დღემ ძირითადად მშვიდ გარემოში ჩაიარა, თუმცა მეორე ტურის წინასაარჩევნო პერიოდი პოლარიზებული იყო და ძალადობისა და შევიწროების ინციდენტებით ხასიათდებოდა.

მათივე თქმით, მეორე ტურამდე პერიოდი ძალადობის შემთხვევებით, დაშინების შესახებ ინფორმაციითა და სხვა ისეთი ქმედებებით ხასიათდებოდა, რომელიც საარჩევნო კანონმდებლობის ნორმებს არღვევდა. დელეგაცია აღნიშნავს, რომ ორ ტურს შორის კამპანიის რიტორიკა კიდევ უფრო აგრესიული და მტრული გახდა, შიშის შემცველი მესიჯებითა და არასტაბილურობის შესახებ მუქარებით.

NDI აღნიშნავს, რომ გამოვლინდა ხმის რამდენჯერმე მიცემისა და ხმების დათვლის პროცესის მანიპულირების ერთეული, თუმცა სერიოზული შემთხვევები - რაც NDI-ის დამკვირვებლების მიერაც დაფიქსირდა, რაც საარჩევნო ადმინისტრაციამ სრულყოფილად უნდა გამოიძიოს.