ქუთაისის სააპელაციო სასამართლოს თავმჯდომარის, დიმიტრი გვრიტიშვილი არასამთავრობო სექტორის კრიტიკას ტოკ-შოუ არჩევანში პასუხობს და აინტერესებს, "სად იყვნენ ეს არასამთავრობო ორგანიზაციები 2012 წლამდე".

დიმიტრი გვრიტიშვილის თქმით, იუსტიციის საბჭოს წევრის სტატუსით მას აქვს უფლება, დაიცვას მოსამართლეები, რომელთაც აცვიათ მანტიები და ამის საშუალებას კანონი უზღუდავს.

"მოსამართლეებს უშუალოდ არ შეუძლიათ, თავი დაიცვან და ჩვენ გვაკისრია ფუნქცია, რომ დავიცვათ სისტემის ინტერესები და დავიცვათ თითოეული მოსამართლე ამგვარი თავდასხმებისგან და, თუ საჭიროა, იმავე მეთოდებით დავუპირისპირდეთ ოპონენტებს, რომლებიც ლანძღავენ სასამართლო ხელისუფლებას", — განაცხადა დიმიტრი გვრიტიშვილმა.

მისივე თქმით, მესამე სექტორი მოსამართლეების დიდ ნაწილს უკავშირებს მიხეილ სააკაშვილის რეჟიმს და თავადაც აინტერესებს, რას აკეთებდა არასამთავრობო სექტორი 2012 წლამდე.

გვრიტიშვილი ამბობს, რომ არასამთავრობოების მხრიდან სასამართლო სისტემაზე თავდასხმა დაიწყო 2015 წლიდან, როდესაც შეიცვალა უზენაესი სასამართლოს თავჯდომარე. დიმიტრი გვრიტიშვილის განცხადებით, ნინო გვენეტაძემ, როგორც ჩანს, ვერ გაამართლა მესამე სექტორის მოლოდინი.

"ნინო გვენეტაძემ მხარდაჭერა სასამართლო კორპუსში ვერ მოიპოვა. ამის პარალელურად გამოიკვეთა, რომ ლევან მურუსიძე გახდა ლიდერი. ამ ადამიანმა, ლევან მურუსიძემ, როგორც ლიდერმა, პიროვნული თვისებიდან გამომდინარე, თავის გარშემო შემოიკრიბა მოსამართლეები. არასამთავრობოებმა ნახეს, რომ რეალურად სასამართლო ხელისუფლება შედგა ქვეყანაში", — განაცხადა დიმიტრი გვრიტიშვილმა.

დიმიტრი გვრიტიშვილის განცხადებით, მაშინ, როდესაც არასამთავრობოები მუდმივად საუბრობენ იმაზე, რომ ის და მისი კოლეგები გამწესებულები იყვნენ მოსამართლეებად სააკაშვილის დროს, რატომ ავიწყდებათ მათ, რომ ეკა გიგაურს სწორედ ამ დროს მიენიჭა კაპიტნის წოდება.

"მე არ ვარ ჩვეულებრივი მოსამართლე და თავს არ ვიქებ, რატომ ვამბობ, ნაზი ჯანეზაშვილს საკუთარი აზრი არ აქვს მეთქი? იმიტომ, რომ გადმოიღო ლექსიკა დათო ჭიჭინაძის და სხვების", — განაცხადა დიმიტრი გვრიტიშვილმა.

"ეს ადამიანები არიან პოლიტიკოსები და იმ მესიჯბოქსებით საუბრობენ, რომლითაც საუბრობს ქართული ოცნება," — ასე ეხმაურება საერთაშორისო გამჭვირვალობა - საქართველოს აღმასრულებელი დირექტორი ეკა გიგაური დიმიტრი გვრიტიშვილის განცხადებებს არასამთავრობო სექტორთან მიმართებით ტოკ-შოუ არჩევანში.

ეკა გიგაური აცხადებს, რომ მისთვის გაუგებარია ამ მოსამართლეების ლექსიკა.

"შევხედოთ, მაგალითად, ჩემს ფეისბუქს, ის თითოეულ პოსტზე კომენტარს მიწერს გაუგებარი ტერმინოლოგიით. ჩემთვის წარმოუდგენელი იყო, რომ მოსამართლეს შეუძლია, ამ ტერმინოლოგიით ისაუბროს და ასე წეროს. თავიდან მეგონა, რომ სამთავრობო ტროლები იყო", — განაცხადა გიგაურმა.

მისი თქმით, იუსტიციის საბჭოს მოსამართლე წევრები ცდილობენ, რომ როგორმე შეიყვანონ კლანის წევრები უზენაეს სასამართლოში და ამის უკან დგას ქართული ოცნება.

საქართველოს დემოკრატიული ინიციატივის თავმჯდომარე, გიორგი მშვენიერაძე, არჩევანის ეთერში დიმიტრი გვრიტიშვილის განცხადებებს აკრიტიკებს.

"ბატონი გვრიტიშვილი სამაგალითო მოსამართლე იქნებოდა საბჭოთა სამართალში, საბჭოთა სასამართლო სისტემაში იმიტომ, რომ მას არასდროს არ აკანკალებია ხელი, არ შეცბუნებულა არასდროს, ხომ არ იღებს ისეთ გადაწყვეტილებას, სხვისი უფლება შეილახოს," — ამბობს მშვენიერაძე.

მშვენიერაძე ამბობს, რომ იუსტიციის უმაღლეს საბჭოში წევრთა უმრავლესობა - 9 წევრი, პირდაპირ არის ჩინჩალაძის ყოფილი თანაშემწე.

"თბილისის სააპელაციო სასამართლოს თავმჯდომარე არის ბატონი მიხეილ ჩინჩალაძე, ქუთაისის სააპელაციო სასამართლოს თავმჯდომარე არის ბატონი დიმიტრი გვრიტიშვილი, ყველაზე დიდი საქალაქო სასამართლოს თავმჯდომარე არის ბატონი ვასილ მშვენიერაძე, საქართველოში ყველაზე დიდი სამოქალაქო კოლეგიის თავმჯდომარე არის ბატონი სერგო მეთოფიშვილი. კლანზე როცა ვლაპარაკობთ ჩვენ, ეს არის კლანი, ეს ადამიანები არიან ერთმანეთთან გადაჯაჭვული ადამიანები", — განაცხადა მშვენიერაძემ.

თავად დიმიტრი გვრიტიშვილმა სასამართლო სისტემაში მუშაობა ნაციონალური მოძრაობის მმმართველობის დროს დაიწყო. 2012 წლამდე, 2005-2007 წლებში მუშაობდა თბილისის საკრებულოსა და მთავრობის აპარატის მთავრობის იურიდიული განყოფილების მთავარი სპეციალისტის თანამდებობაზე. 2007 წელს მუშაობდა თბილისის მერიის ადმინისტრაციის იურიდიული სამსახურის სასამართლოსთან ურთიერთობის განყოფილების უფროსად. 2008-2012 წლებში იყო თბილისის საქალაქო სასამართლოს მოსამართლე. 2012 წელს კი ქუთაისის სააპელაციო სასამართლოს მოსამართლე გახდა. 2015 წლიდან არის ქუთაისის სააპელაციო სასამართლოს თავმჯდომარე. 2017 წლიდან დიმიტრი გვრიტიშვილის იუსტიციის უმაღლესი საბჭოს წევრია.

2012 წელს დიმიტრი გვრიტიშვილის გადაწყვეტილებით კონტროლის პალატამ 5 მილიონამდე ლარით კანონიერად დააჯარიმა ივანიშვილის ერთ-ერთი კომპანია შპს მენეჯმენტ სერვისი. ადვოკატები ეკა ბესელია და სანდრო ბარამიძე მოსამართლის აცილებასაც ითხოვდნენ. ეკა ბესელიამ მოსამართლეს უწოდა არაობიექტური, მიკერძოებული და იგი დაადანაშაულა ფორმალური სასამართლოს მოწყობაში.

2012 წლის საპარლამენტო არჩევნებამდე რამდენიმე დღით ადრე, პოლიციელებმა სცემეს იმდროინდელ ოპოზიციონერ აქტივისტს, დაჩი ცაგურიასა და მის მეგობარს. ცაგურიას ინტერსებს სასამართლოში საქართველოს ახალგაზრდა იურისტთა ასოციაცია იცავდა, მოსამართლე დიმიტრი გვრიტიშვილი იყო.

ცაგურიას ადვოკატის, კახა კოჟორიძის თქმით, წინასწარ იყო ცნობილი, მოსამართლე რა გადაწყვეტილებებს გამოიტანდა. მოსამართლემ კოჟორიძეს პოლიციელისთვის კითხვების დასმის საშუალება არ მისცა. მოსამართლე გვრიტიშვილმა დაკავებულები დამნაშავედ სცნო და 10-დღიანი პატიმრობა მიუსაჯა.