პრეზიდენტი სალომე ზურაბიშვილი ცილისწამების კანონის გამკაცრებასთან დაკავშირებით არასამთავრობო ორგანიზაციებთან კვირის ბოლოდან კონსულტაციებს იწყებს. ამის შესახებ ზურაბიშვილმა პრესკონფერენციაზე On.ge-ს კითხვის საპასუხოდ განაცხადა.

როგორც პრეზიდენტმა თქვა, დეზინფორმაციასთან დაკავშირებით მან ბრიუსელში ისაუბრა. მისი აზრით, ცილისწამება მსოფლიოს დღევანდელი მოცემულობაა, რომელიც სოციალურ ქსელებთან არის დაკავშირებული. პრესკონფერენციაზე მანვე აღნიშნა, რომ ნატოსა და ევროკავშირის მხრიდან ამ საკითხზე სასაუბროდ მზაობა არის.

"ჩემი ღრმა რწმენით თუ რამე რეგულაციაში არ მოვიყვანეთ, საზოგადოებრივი დაძაბულობა, რაც არის ჩვენი საზოგადოების ნიშანი, გაგრძელდება... ეს ნაკლებად ეხება მედიას, უფრო ეხება უმართავ სოციალურ ქსელებს", — თქვა ზურაბიშვილმა.

ცილისწამების კონტროლის ინიციატივა და გამოხატვის თავისუფლების შეზღუდვის საფრთხე

საქართველოს პრეზიდენტს, სალომე ზურაბიშვილს მიაჩნია, რომ საჭიროა ისეთი კანონმდებლობა, რომელიც უზრუნველყოფს ადამიანის ღირსების მეტ დაცულობას და სიტყვის თავისუფლებასაც არ შეზღუდავს. ცილისწამების პრობლემაზე ზურაბიშვილმა საახალწლო მილოცვაში ისაუბრა და აღნიშნა, რომ ევროპის ქვეყნებში ეს პრობლემა გამოხატვის თავისუფლების შეზღდუვის გარეშე მოგვარდა. მან პარლამენტს კანონის მიღებისკენ მოუწოდა.

ზურაბიშვილის შემდეგ ამ საკითხზე საჯაროდ მართლმადიდებელი ეკლესიის პატრიარქმა, ილია მეორემ ისაუბრა. საშობაო ეპისტოლეში პატრიარქმა განაცხადა, რომ ხშირად სიტყვის თავისუფლებით "ბოროტად სარგებლობენ". მისი თქმით, "დიდი მცდელობაა, რომ სიტყვის თავისუფლება დამახინჯებულად აღიქმებოდეს".

პარლამენტის თავმჯდომარე ირაკლი კობახიძე პატრიარქის საშობაო ეპისტოლეს გამოეხმაურა და განაცხადა, რომ უნდა დაიწყოს მსჯელობა არა მხოლოდ ცილისწამების, არამედ მძიმე შეურაცხყოფისა და გახშირებული ბილწისტყვაობის პრობლემის მოგვარებაზე.

ცილისწამება დასჯადი ქმედება 2004 წლის შემდეგ აღარაა, ანუ მას შემდეგ, რაც სიტყვისა და გამოხატვის თავისუფლების შესახებ ახალი კანონი მიიღეს. 2004 წლამდე არსებული კანონით ცილისწამება ისჯებოდა ჯარიმით ან საზოგადოებისათვის სასარგებლო შრომით, ვადით ასიდან ორას საათამდე, ანდა გამასწორებელი სამუშაოთი, ვადით ერთ წლამდე.

ცილისწამების დეკრიმინალიზება არ ნიშნავს, რომ ასეთი ქმედება შეიძლება უყურადღებოდ დარჩეს. საქართველოში დღეს მოქმედი კანონმდებლობით ნებისმიერ პირს შეუძლია სამოქალაქო წესით იჩივლოს ცილისწამებისთვის და მოითხოვოს ზიანის ანაზღაურება, თუმცა მტკიცების ტვირთი ამ შემთხვევაში თავად მომჩივანზეა.

არასამთვრობო ორგანიზაციები ინიცაიტივას გამოხატვის თავისუფლების შეზღუდვის საფრთხედ მიიჩნევენ და აცხადებენ, რომ ეს ქვეყნის დემოკრატიულ განვითარებას შეუშლის ხელს.

"ჩვენი საზოგადოების მრავალწლიანი ძალისხმევის შედეგია ის, რომ მოქმედი კანონმდებლობა გამოხატვის თავისუფლების მაღალ სტანდარტს აწესებს და ეს ყოველთვის მიიჩნეოდა ქართული დემოკრატიის დიდ მონაპოვრად", — ასე გამოეხმაურა კოალიცია ცილისწამების შესახებ კანონის მიღების ინიციატივას.

ამავე თემაზე: