თბილისში რუსული კომპანია Yandex Taxi-ის მძღოლს სცემეს. შემთხვევა 31 აგვისტოს, ღამით მოხდა.

შინაგან საქმეთა სამინისტროს ინფორმაციით, საპატრულო პოლიციას ტაქსის მძღოლმა მიმართა, რომ მას სიტყვიერი და ფიზიკური შეურაცხყოფა მიაყენეს. საქმეზე ადმინისტრაციული სამართლდარღვევის კოდექსის თანახმად ერთი პირი დააკავეს, ხოლო შეურაცხყოფის ფაქტზე, დაწყებულია გამოძიება სისხლის სამართლის კოდექსის 125-ე მუხლით, რაც ცემას გულისხმობს.

აგვისტოს ბოლოდან Yandex Taxi ქართულ ბაზარზე შემოვიდა და მომსახურება თბილისში დაიწყო. იგი რუსეთში ტაქსის გამოძახების სერვისია, რომელსაც ქვეყნის მასშტაბით 200-მდე ტაქსის კომპანია იყენებს. რუსეთის ფარგლებს გარეთ, საქართველო რიგით მეოთხე ქვეყანაა, რომელშიც აღნიშნული მომსახურება იფუნქციონირებს. ამ დრომდე კომპანია ბელორუსის, ყაზახეთისა და სომხეთის ბაზარს ემსახურებოდა.