ათონელის რეზიდენციაში მისულმა საქართველოს მეხუთე პრეზიდენტმა, სალომე ზურაბიშვილმა პირველ სამუშაო დღეს ადმინისტრაციის ხელმძღვანელი და საპარლამენტო მდივანი წარადგინა. ზურაბიშვილმა დაადასტურა მანამდე გავრცელებული ინფორმაცია და განაცხადა, რომ გუშინ, 17 დეკემბერს ამ თანამდებობებზე ლაშა ჟვანია და დიმიტრი გაბუნია დანიშნა.

ადმინისტრაციის ხელმძღვანელი ლაშა ჟვანია გახდა, რომელიც მანამდე საპატრიარქოს ფონდის ხელმძღვანელი იყო. საპარლამენტო მდივანი კი დიმიტრი გაბუნია, რომელიც არაერთ გახმაურებული საქმეში მონაწილეობდა ადვოკატის სტატუსით. ის იყო ქალთა მიერ სექსუალურ შევიწროებაში დადანაშაულებული ზვიად დევდარიანის ადვოკატიც.

ზურაბიშვილმა განაცხადა, რომ პრესასთან ისევ ნათია პავლიშვილი ითანამშრომლებს. მისი თქმით, პიარის მიმართულება გაძლიერდება და მალე ახალ თანამშრომლებს აიყვანენ. ზურაბიშვილმა განაცხადა ისიც, რომ კვირის ბოლოს ან მაქსიმუმ ორშაბათს იტყვის "ვინ იქნება ადმინისტრაციის მთავარი ბირთვი".

ზურაბიშვილი ორბელიანების რეზიდენციაში იმუშავებს. ჯერჯერობით უცნობია, რა განთავსდება ყოფილ ადმინისტრაციაში, ავლაბრის რეზიდენციის შენობაში. გადაწყვეტილება მთავრობამ უნდა მიიღოს. ზურაბიშვილს არასდროს დაუმალავს, რომ ავლაბრის რეზიდენციაზე პრეზიდენტობის შემთხვევაში უარს იტყოდა. ისიც კი თქვა, რომ ამ რეზიდენციის ჰავა და აურა არ უხდება.

ქართული ოცნების საარჩევნო დაპირების მიხედვით, ათონელის ქუჩაზე მდებარე ორბელიანების სასახლეში უნდა გადასულიყო საქართველოს პრეზიდენტის ადმინისტრაცია. 2013 წლის არჩევნების დასრულების შემდეგ გიორგი მარგველაშვილმა განაცხადა, რომ არ აპირებს ადმინისტრაციის ავლაბრიდან გადატანას. ეს საკითხი გრძელვადიანი დაპირისპირების საგანიც კი გახდა. ივანიშვილის მთავარი არგუმენტი იყო ის ხარჯი, რაც ავლაბრის რეზიდენციის შენახვას სჭირდებოდა. მისი თქმით ეს იყო "ჭარბი ფართი".

საქართველოს არჩეული პრეზიდენტის, სალომე ზურაბიშვილის ინაუგურაცია 16 დეკემბერს გაიმართება. ქვეყნის ახალი პრეზიდენტის მიერ ფიცის დადებისა და უფლებამოსილებაში შესვლის ცერემონია, კონსტიტუციის მიხედვით, პრეზიდენტის არჩევის დღიდან მესამე კვირა დღეს იმართება. სალომე ზურაბიშვილის მიერ პრეზიდენტის ფიცის დადებისთანავე წყდება მოქმედი პრეზიდენტის, გიორგი მარგველაშვილის უფლებამოსილება.