სალომე ზურაბიშვილის განცხადებით, გამარჯვების შემთხვევაში ის ორბელიანის სასახლეში მოაწყობს პრეზიდენტის კაბინეტს. ზურაბიშვილის თქმით, მისი სახლი რეზიდენციასთან ახლოს არის და ფეხით შეუძლია გადასვლა და უკან დაბრუნება. ამის შესახებ საპრეზიდენტო კანდიდატმა იმედის კვირაში ისაუბრა.

"მე ვთვლი, რომ აურა რომელიც არის პრეზიდენტის ავლაბრის რეზიდენციაში მე არ მიხდება, არც აურა და არც ჰავა. ორბელიანების სასახლე ბევრად უფრო უხდება ქვეყანას, ვიდრე ფსევდორაიხსტაგი მიშას მიერ მოფიქრებული", — განაცხადა სალომე ზურაბიშვილმა.

სალომე ზურაბიშვილმა აქამდეც აღნიშნა, რომ პრეზიდენტი ავლაბრის რეზიდენციაში არ უნდა ცხოვრობდეს. მან, ასევე, აღნიშნა, რომ პრეზიდენტის რეზიდენცია სახელმწიფო სიმბოლოა და სახელმწიფო ფუნქციის მატარებლად უნდა დარჩეს.

ზურაბიშვილის განმარტებით, სასახლეში შეიძლება, პრემიერ-მინისტრი, საგარეო საქმეთა მინისტრი შევიდეს ან უცხოელების მიღების ადგილი გახდეს. მანვე აღნიშნა, რომ ეს გადაწყვეტილება მთავრობამ უნდა მიიღოს.

ქართული ოცნების საარჩევნო დაპირების მიხედვით, ათონელის ქუჩაზე მდებარე ორბელიანების სასახლეში უნდა გადასულიყო საქართველოს პრეზიდენტის ადმინისტრაცია. 2013 წლის არჩევნების დასრულების შემდეგ გიორგი მარგველაშვილმა განაცხადა, რომ არ აპირებს ადმინისტრაციის ავლაბრიდან გადატანას.