დედაქალაქში ქუჩის მუსიკის ფესტივალი გაიმართება და ქართველი მსმენელის წინაშე 150-მდე მუსიკოსი წარდგება. ამის შესახებ თბილისის მერმა კახა კალაძემ მუნიციპალიტეტის მთავრობის დღევანდელ სხდომაზე განაცხადა.

მისი თქმით, თბილისის მერიის კულტურის, განათლების, სპორტისა და ახალგაზრდულ საქმეთა საქალაქო სამსახურის, ასევე, თბილისის ღამის ეკონომიკის განვითარების პროექტის მხარდაჭერით, ქართველი მუსიკოსები 10 ნოემბერს, 15-დან 22 საათამდე აღმაშენებლის გამზირზე, პუშკინის სკვერსა და დედაენის ბაღში დაუკრავენ.

მერიის კულტურის საქალაქო სამსახურში On.ge-ს განუცხადეს, რომ მუსიკოსებზე შეზღუდვა არ ყოფილა.

"აქტივობა იყო საკმაოდ მაღალი. ამ ეტაპისთვის მიმდინარეობს შერჩეული მუსიკოსების ჟანრობრივი გადარჩევა, რომლის შემდეგაც მოხდება მუსიკოსების გადანაწილება სხვადასხვა ლოკაციაზე. დღეს დავასრულებთ ამ ეტაპსაც", — განმარტებულია საქალაქო სამსახურის მიერ On.ge-სთვის წერილობით მიწოდებულ კომენტარში.

თბილისის მერის ინფორმაციით, თბილისში ღამის ეკონომიკის პირველი საერთაშორისო ფორუმიც გაიმართება, რომლის ფარგლებშიც, დედაქალაქს ღამის მერები და ურბანული განვითარების, კულტურის მენეჯმენტის შესაბამისი ექსპერტები ეწვევიან. კალაძის თქმით, აღნიშნულ ღონისძიებას ცხრა ქვეყნის წარმომადგენლები დაესწრებიან.

"პარალელურად, კლუბები, საკონცერტო დარბაზები და რესტორნები ფორუმის დღეებში ერთვებიან. აღნიშნული ღონისძიება ჩვენს დედაქალაქში 30 ნოემბრიდან პირველი დეკემბრის ჩათვლით ჩატარდება. გვინდა, რომ საუკეთესო ქვეყნების მაგალითები გადმოვიტანოთ და დარწმუნებული ვარ, რომ ღამის ეკონომიკის განვითარების პროგრამის ფარგლებში, ბევრ საინტერესო პროექტს განვახორციელებთ", — აღნიშნა დედაქალაქის მერმა.