არასამთავრობო ორგანიზაციები მიიჩნევენ, რომ გუშინ, 26 სექტემბერს რუსთაველის გამზირზე, სარალიძე-მაჩალიკაშვილის აქციაზე პოლიცია შეკრების კონსტიტუციური უფლებაში უხეშად ჩაერია, რადგან აქციის მონაწილეებს კარვების გაშლის უფლება შეუზღუდა.

მათი თქმით, პოლიციის ქმედება, არ დაუშვას აქციის მონაწილეების მიერ შეკრების ადგილას კარვის განთავსება, მშვიდობიანი შეკრების ფორმის კონტროლის მცდელობაა. საუბარია გუშინდელ, 26 სექტემბრის ინციდენტზე, როდესაც, ზაზა სარალიძის თქმით, პოლიციამ მას და აქციის სხვა მონაწილეებს გზა გადაუკეტა და კარავი და სხვა ნივთები მანქანიდან წაიღო.

"შინაგან საქმეთა სამინისტრო ვალდებულია, ხელი არ შეუშალოს შეკრების ჩატარებას იმ ფორმით, რომელიც მშვიდობიანია და არჩეულია აქციის მონაწილეთა მიერ. აქციის ფორმის, დროისა და ადგილის არჩევის უფლება ისევეა შეკრების უფლების ნაწილი, როგორც მისი შინაარსი და კარავი შესაძლოა წარმოადგენდეს აქციის გაგრძელებისათვის სასიცოცხლოდ მნიშვნელოვან ატრიბუტს", — წერია არასამთავრობოების განცხადებაში.

არასამთავრობოების თქმით, საქართველოს კანონმდებლობა დროებითი კონსტრუქციების, მათ შორის, კარვის დადგმას არ კრძალავს, თუ ის გზის სავალ ნაწილს არ უშლის ხელს. კარვის დადგმის შეზღუდვის გამო ისინი სამართალდამცავების ქმედებას უკანონოსა და არაკონსტიტუციურს უწოდებენ.

"შინაგან საქმეთა მინისტრის მიერ გაკეთებული განმარტება, რომ აღნიშნული აკრძალვა ემსახურებოდა პროვოკაციული ქმედებების თავიდან არიდებას, მართლწესრიგის დაცვასა და უსაფრთხოების უზრუნველყოფას უსაფუძვლოა და გვაფიქრებინებს, რომ პოლიცია მოქმედებს არა საზოგადოებრივი წესრიგის დაცვის მიზნით, არამედ პროტესტის გამოხატვისათვის მიზანმიმართული ხელშეშლის ინტერესით", — ვკითხულობთ განცხადებაში.

არასამთავრობოები პროკურატურას გამოძიების დაწყებისკენ, შინაგან საქმეთა სამინისტროს კი მშვიდობიანი შეკრების უფლებაში ჩარევის შეწყვეტისკენ მოუწოდებენ.

განცხადებას ხელს შემდეგი ორგანიზაციები აწერენ:

• საქართველოს ახალგაზრდა იურისტთა ასოციაცია (GYLA);
• ადამიანის უფლებების სწავლებისა და მონიტორინგის ცენტრი (EMC);
• საქართველოს დემოკრატიული ინიციატივა (GDI);
• პარტნიორობა ადამიანის უფლებებისათვის (PHR);
• ადამიანის უფლებათა ცენტრი;
• საერთაშორისო გამჭვირვალობა - საქართველო (TI);
• მწვანე ალტერნატივა;
• საფარი;
• დემოკრატიისა და უსაფრთხო განვითარების ინსტიტუტი (IDSD);
• თანასწორობის მოძრაობა;
• ქალთა ინიციატივების მხარდამჭერი ჯგუფი (WISG);
• ტოლერანტობის და მრავალფეროვნების ინსტიტუტი (TDI);
• სამართლიანი არჩევნებისა და დემოკრატიის საერთაშორისო საზოგადოება (ISFED);
• კონსტიტუციის 42-ე მუხლი;
• ინფორმაციის თავისუფლების განვითარების ინსტიტუტი (IDFI);
• ღია საზოგადოების ფონდი (OSGF).

გუშინ, 27 სექტემბერს ზაზა სარალიძემ განაცხადა, რომ მაშინ, როდესაც ისინი მანქანით მიდიოდნენ პარლამენტისკენ, პოლიციამ გზა გადაუკეტა და კარავი და სხვა ნივთები მანქანიდან წაიღო. მისივე თქმით, მას თბილისის მერიასთან ჰქონდა შეთანხმება, რომ გაეშალა კარავი. სარალიძე რუსთაველის გამზირზე, ცენტრალურ მაგისტრალზე პროტესტის ნიშნად გაწვა.