ზაზა სარალიძე რუსთაველის გამზირზე ცენტრალურ მაგისტრალზე პროტესტის ნიშნად გაწვა. ის პოლიციამ ტროტურიადან უკვე გადაიყვანა.

"განმარტებას არავინ არ იძლევა, რის გამო მოგვპარეს ყველაფერი. უნდათ ასე და ვსო. არ მოველოდი, რადგან გუშინ ჩავაყენე სამართალდამცველები საქმის კურსში", - ამბობს სარალიძე.

სარალიძის თქმით, მაშინ როდესაც ისინი მანქანით მიდიოდნენ პარლამენტისკენ, პოლიციამ მათ გზა გადაუკეტა და კარავი და სხვა ნივთები მანქანიდან წაიღო. მისივე თქმით, მას თბილისის მერიასთან ჰქონდა შეთანხმება, რომ გაეშალა კარავი.

შსს-ს პრესსამსახური ამ თემაზე ინფორმაციას არკვევს.

შვილმოკლული მამების აქცია

ზაზა სარალიძე და მალხაზ მაჩალიკაშვილი საქართველოს პარლამენტთან მე-16 დღეა აქციას მართავენ. ზაზა სარალიძე ითხოვს მისი შვილის მკვლელისა და იმ ადამიანების დასჯას, ვინც მკვლელს ხელს აფარებდა, მალხაზ მაჩალიკაშვილი კი სპეცოპერაციის შედეგად დაღუპული შვილის საქმის გამოძიებას ითხოვს. მისი თქმით, თემირლან მაჩალიკაშვილი არ იყო დაკავშირებული ტერორისტებთან და სახელმწიფოს მხრიდან ადგილი ჰქონდა გადაცდომას.

ზაზა სარალიძემ აქციები 10 სექტემბერს მას შემდეგ განაახლა, რაც პარლამენტში შექმნილმა საგამოძიებო კომისიამ ანგარიში გამოაქვეყნა.

2018 წლის 31 მაისს ხორავას ქუჩაზე მომხდარი მკვლელობის საქმეზე მოსამართლემ განაჩენი გამოაცხადა, რომლის მიხედვითაც დავით სარალიძის მკვლელი უცნობია, რასაც დაზარალებული ზაზა სარალიძის მხრიდან პროტესტი მოჰყვა. მან ქუჩის გამოსვლების ორგანიზება დაიწყო.