საზოგადოებრივი მაუწყებლის საინფორმაციო გამოშვება მოამბეში, არხის საინფორმაციო სამსახურის უფროსმა გიორგი გვიმრაძემ განცხადება გააკეთა პირველი არხის ეთერში ცენტრისტების რეკლამის გაშვებასთან დაკავშირებით.

გვიმრაძე განმარტავს, რომ მაუწყებელი კანონმდებლობით ვალდებული იყო გაეშვა უფასო სარეკლამო რგოლი ისე, რომ მის შინაარსში არ ჩარეულიყო:

"საზოგადოებრივ მაუწყებელს არ ჰქონდა არანაირი შესაძლებლობა რომ არ გაეშვა ხსენებული პოლიტიკური რეკლამა. მათ შორის არ ჩარეულიყო მის შინაარსობლივ ნაწილში. საზოგადოებრივი მაუწყებლის მენეჯმენტი, თანამშრომლები ცალსახად ემიჯნებიან იმ შინაარსს, რომელიც იყო გასული არსებულ პოლიტიკურ რეკლამაში. მე აქედან გამომდინარე მინდა მოვუწოდო იმ ორგანოებს, რომლებსაც ხელეწიფებათ მსგავსი შეცდომის მსგავსი ხარვეზის გამოსწორება კანონმდებლობაში. სამწუხაროა ქვეყანაში არ არსებობდეს სამართლებრივი ბერკეტი, რომ არ ხდებოდეს ოკუპაციის დაკანონების ტირაჟირება".

13 აგვისტოს პოლიტიკური გაერთიანება ცენტრისტები ხაჩიშვილი - ბედუკაძე საარჩევნო რეკლამა გავრცელდა. პარტიის დაპირებებია: რუსული პენსია - 400 ლარი, მივიღებთ ორმაგი მოქალაქეობის კანონს და დავაკანონებთ რუსულ სამხედრო ბაზებს.

ასევე, საზოგადოებრივი მაუწყებლის პირველადი პროფკავშირი განცხადებას ავრცელებს, რომ ისინი ემიჯნებიან მაუწყებლის ეთერით გასულ რუსულ პროპაგანდას და მზად არიან საკუთარი ხელფასიდან გადაიხადონ სახელმწიფოს მიერ დაკისრებული ჯარიმა ანტიეროვნული კლიპის არ გაშვების სანაცვლოდ.