ზაზა სარალიძემ შიმშილობა შეწყვიტა. ეს გადაწყვეტილება მან პატრიარქთან შეხვედრის შემდეგ მიიღო. სარალიძის თქმით, შიმშილობის შეწყვეტის მიუხედავად აქციები პარლამენტთან მაინც გაგრძელდება იქამდე, სანამ მოთხოვნებს არ დააკმაყოფილებენ.

საქართველოს კათოლიკოს-პატრიარქსა და ზაზა სარალიძეს შორის პირისპირ შეხვედა საპატრიარქოში დაახლოებით ერთი საათის განმავლობაში მიმდინარეობდა.

ზაზა სარალიძემ პატრიარქთან შეხვედრა 16 სექტემბრის აქციაზე დააანონსა. მისი განცხადებით, შეხვედრის ინიციატივა პატრიარქს ეკუთვნის.

სარალიძე პატრიარქს რამდენიმე თვის წინ შეხვდა, შეხვედრის სურვილი სარალიძემ თავად გამოთქვა. მაშინ სარალიძემ საპატრიარქო უკომენტაროდ დატოვა.

რუსთაველის გამზირზე, პარლამენტთან ზაზა სარალიძისა და მალხაზ მაჩალიკაშვილის საპროტესტო აქციები 10 სექტემბრიდან განახლდა. სარალიძე ითხოვს მისი შვილის მკვლელისა და იმ ადამიანების დასჯას, ვინც მკვლელს ხელს აფარებდა, მალხაზ მაჩალიკაშვილის მოთხოვნა კი სპეცოპერაციის შედეგად დაღუპული შვილის საქმის გამოძიებაა.