ბოინგმა მისი ახალი თაობის თვითმფრინავების ერთ-ერთი პირველი მოდელის, 777X-9-ს თითქმის დასრულებული ვარიანტი წარმოგვიდგინა.

წარმოდგენილი თვითმფრინავი სტატიკური მოდელია, რომელსაც ბოინგი ახალი ხომალდის სტრუქტურის შესამოწმებლად გამოიყენებს.

ფოტო: Boeing

"აღნიშნულ მოდელზე შევამოწმებთ რამდენად კარგად უძლებს ის სხვადასხვაგვარ დატვირთვას, ეს აუცილებელია რათა დავრწმუნდეთ, რომ თვითმფრინავი მგზავრების უსაფრთხო გადაყვანისთვის მზად არის." - აცხადებენ კომპანიაში.

ბოინგის თქმით 777X მსოფლიოში ყველაზე დიდი და ყველაზე ეკონომიური ორ ძრავიანი თვითმფრინავი იქნება. ხომალდს ფრთების დასაკეცი სპეციალური მექანიზმი აქვს, რაც ფრენის დროს საწვავის დაზოგვის საშუალებას იძლევა, თვითმფრინავი თავის კონკურენტებზე 12 პროცენტით ნაკლებ საწვავს მოიხმარს.

ფოტო: Boeing

მისი ფრთების სიგრძე ჯამში 70 მეტრია, რაც კომპანიის ისტორიაში ყველაზე დიდია. თვივთმფრინავს დაახლოებით 412 მგზავრის გადაყვანა შეეძლება. მაქსიმალური ფრენის მანძილი კი 16 000 კილომეტრია.

კომპანია 777X-ზე უკვე რამდენიმე წელია მუშაობს, ეს კი თვითმფრინავის პირველი სრულმასშტაბიანი მოდელია. ტესტირება დაახლოებით ერთი წლის განმავლობაში გაგრძელდება. თვითმფრინავი რეგულარულ ფრენებს კი 2020 წლიდან დაიწყებს.

ფოტო: Boeing