Vere Palace-ში პრორუსულ მედიაფორუმზე სასტუმროსთან გამართული საპროტესტო აქციის მონაწილეები არ შეუშვეს. როგორც სასტუმროს მენეჯერმა On.ge-სთან საუბრისას განაცხადა, საპროტესტო აქციიდან მომეტებული საფრთხე მოდიოდა და ამით შესაძლოა, პრორუსული მედიაფორუმის მონაწილეების ზიანი მისდგომოდათ.

"საპროტესტო აქციიდან იყო ეჭვი, რომ შეიძლებოდა ესკალაცია მომხდარიყო და, შესაბამისად, კონკრეტულმა სახელმწიფო უწყებებმა, რომლებსაც ეხებათ უსაფრთხოების დაცვა, მიიღეს შესაბამისი გადაწყვეტილებები", — განუმარტა სასტუმროს მენეჯერმა On.ge-ს.

სასტუმრო Vere Palace-თან დილიდან საპროტესტო აქცია მიმდინარეობდა. აქციის მონაწილეები პრორუსული ფორუმი ჩატარებას აპროტესტებენ. მათ სასტუმროსთან დოლ-გარმონის თანხლებით სუფრის გაშლა დაიწყეს და რამდენიმე სადღეგრძელო შესვეს.

"ვეხმარებით, რომ სუფრა გავუშალოთ. მათ ხომ უყვართ ქართული ჭაჭა, ხაჭაპური, ხინკალი და იქნებ ასე გადმოვიპატიჟოთ ერთმორწმუნეები", — განაცხადა აქციის ერთ-ერთმა მონაწილემ.

საქართველოში ჟურნალისტებისთვის ვლადიმერ პუტინის ფონდის მიერ დაფინანსებული ფორუმი იმართება. 2-დღიან ღონისძიებაში მონაწილეობას იღებენ პრორუსული განწყობებით ცნობილი მედიის წარმომადგენლები, ჟურნალისტები და მკვლევრები. რუსული დელეგაციიდან 4 ჟურნალისტი უკვე გააბრუნეს მოსკოვში ოკუპაციის კანონის წლების წინ დარღვევის გამო. მათი ნაწილი საქართველოშია და მზად არიან 5 სექტემბრიდან ქართველ ჟურნალისტებს პროპაგანდასთან ბრძოლის შესახებ ტრენინგები ჩაუტარონ.

სასტუმრო Vere Palace-ის მენეჯმენტი ამბობს, რომ მათ სასტუმროში პუტინის გრანტით დაფინანსებული, პრორუსული მედიაფორუმის ჩატარების შესახებ არ იცოდნენ.