გერმანიის კანცლერის, ანგელა მერკელის ვიზიტი საქართველოში ოფიციალურად დასრულდა. კავკასიური სამდღიანი ტურნეს ფარგლებში კანცლერი ჯერ სომხეთში გაემგზავრება, შემდეგ კი აზერბაიჯანში.

საერთაშორისო ურთიერთობების სპეციალისტი, გია ჯაფარიძე მერკელის ვიზიტის მნიშვნელობაზე საუბრობს. მისი თქმით, აღსანიშნავია, რომ ქალბატონმა კანცლერმა კავკასიური ტურნე სწორედ თბილისით დაიწყო:

"ეს, პირველ რიგში, საქართველოს მხარდაჭერის გზავნილია ევროპული და ევროატლანტიკური ინტეგრაციის გზაზე. მით უმეტეს მაშინ, როცა ჩვენ ახლა ამ ეტაპზე არც ნატოსთან და ევროპის კავშირთან ხელშესახები ახალი წარმატებები არ გაქვს".

ჯაფარიძე ამბობს, რომ რუსეთისა და გერმანიის ურთიერთობებს საქართველოში ხშირად არასწორად იგებენ. მისივე თქმით, ორ ქვეყანას შორის ურთიერთობა საჭიროებებზეა დაფუძნებული.

"იმას გასაყიდი აქვს გაზი და ენერგორესურსები, ამას კი არა მხოლოდ თავისთვის, არამედ ევროპისთვის სჭირდება ეს ენერგორესურსები. გერმანია არ იყენებს იმდენ რუსულ გაზს, რამდენსაც სხვა ქვეყნები, რომლებიც უფრო ხშირად, ჩვენი მხარდამჭერები გამოდიან, ვიდრე გერმანია".

როგორც ჯაფარიძე ამბობს, გერმანია რჩება პრინციპებისა და ღირებულებების ერთგული და უკრაინის ანექსიის შემდეგ, მისი საგარეო პოლიტიკის ცვლილება შეინიშნება.

"სად გადის ზღვარი გერმანიის ევროპულ პოლიტიკასა და გერმანიის საგარეო პოლიტიკას შორის ძალიან რთულია დაადგინო. მაგრამ გერმანიის ევროპული პოლიტიკაც სწორედაც რომ არის გერმანიის საგარეო პოლიტიკა", - ამბობს ჯაფარიძე.

ჯაფარიძის აზრით, მერკელმა აჩვენა რუსეთს, რომ გერმანია არის ერთგული ღირებულებების და მისთვის არსებობს სტრატეგიული ინტერესები სამხრეთ კავკასიაში, მათ შორის, საქართველოში.

მისი თქმით, გერმანიისთვის საქართველო მნიშვნელოვანია, რადგან გაზრდილი ევროსკეპტიციზმის პირობებში, საქართველო ევროკავშირის მიმართ იმაზე მეტ სოლიდარობას აცხადებს, ვიდრე წევრი ქვეყნები.

რაც შეეხება ტერმინ "ოკუპაციას" რომელიც, კანცლერმა სტუდენტებთან შეხვედრის დროს კითხვის საპასუხოდ გამოიყენა, ჯაფარიძე ამბობს, რომ კანცლერი ამ ტერმინს არასდროს იყენებს. როგორც თვითონ განმარტავს, მსგავსი დამოკიდებულება რუსეთის ფაქტორს უკავშირდება.

"ევროპის კავშირს, რომ სიტყვა ოკუპაცია გამოეყენებინა საქართველოს მიმართებაში ამის წინააღმდეგი იყო. ახსენებს ყირიმზე, მაგრამ საქართველოზე არასდროს. ევროპის კავშირის არც ერთ დოკუმენტში ეს ნახსენები არაა, მარტო ამერიკა იყენებს".

ჯაფარიძე ამბობს, რომ ქართველმა სტუდენტებმა აიძულეს მერკელი, აფხაზეთისა და ცხინვალის რეგიონის ლეგალური სტატუსი ეთქვა.

"რაც დღეს ათქმევინეს სტუდენტებმა, ამას უნდა დავაფუძნოთ მომავალში ევროპასთან და გერმანიასთან ურთიერთობები. ეს უნდა დავიხვიოთ თითზე, უნდა ვთქვა, რომ კანცლერმა თქვა და უკვე ასახეთ დოკუმენტებსა და დეკლარაციებში და თუ ეს ოკუპაციაა მოსთხოვეთ რუსეთს, რომ გაიყვანოს საოკუპაციო ჯარები", - ამბობს ჯაფარიძე.

გარდა ამისა, ჯაფარიძემ ისაუბრა მერკელის ვიზიტის რეგიონულ მნიშვნელობასა და გზავნილებზე. მისი თქმით, მნიშვნელოვანია, რომ მიუხედავად "განსხვავებული დემოკრატიისა და კრიტიკისა" მერკელი აზერბაიჯანშიც ჩადის.

"მნიშვნელოვანია, ეს რეგიონალური ვიზიტი იმ დროს, როდესაც კასპიის ზღვის ზედაპირი გაიყო. ეს ჩარჩო ხელშეკრულება, რომელიც ხუთ ქვეყანას შორის გაფორმდა იძლევა საშუალებას, რომ თურქმენული გაზი და ცენტრალური აზიის ენერგორესურსები აზერბაიჯანის, საქართველოსა და თურქეთის გავლით შევიდეს ევროპის ბაზარზე. ეს ნორდ სტრიმ 2-თან არის კავშირში".

გაიგე მეტი: ანგელა მერკელის საქართველოში ორდღიანი ვიზიტის დეტალები